Штаб Святланы Ціханоўскай падаў першую заяву на расследаванне злачынства беларускіх сілавікоў па ўніверсальнай юрысдыкцыі.
Канвенцыя супраць катаванняў, прынятая ААН у 1984 годзе, устанавіла ў дачыненні да катаванняў так званую «ўніверсальную юрысдыкцыю». Гэта азначае, што вінаватыя ва ўжыванні катаванняў могуць крымінальна пераследавацца ўладамі любой дзяржавы, незалежна ад грамадзянства вінаватых і месца здзяйснення імі дзеяння.
Пададзеная заява для завядзення крымінальнай справы па факце гвалту над мінскім прадпрымальнікам Максімам Харошыным, якога затрымалі ў двары дома ў Мінску, павезлі ў РУУС, дзе ён, па яго словах, быў збіты да такога стану, што яго забрала хуткая. Ён трапіў у бальніцу, пасля якой выехаў у Літву.
Па справе Харошына сабраны вынікі медэкспертызы, якая ўстанавіла цялесныя пашкоджанні. Ёсць таксама фота і відэа ягонага затрымання, на якіх адкрытыя твары падазраваных сілавікоў.
Адвакат Гедрус Данелюс, які падаў заяву ў Генпракуратуру Літвы, тлумачыць, што літоўскі закон дазваляе праводзіць дасудовае расследаванне і сам суд, калі злачынства было ўчыненае не ў Літве і падазраваны не знаходзіцца ў краіне. Абавязковая прысутнасць заяўніка, то-бок ахвяры. І калі ў справе ёсць прамыя доказы, суд па ўніверсальнай юрысдыкцыі мае права на вынясенне прысуду.
Штаб Святланы Ціханоўскай распрацоўвае падачу і іншых такіх заяў у розных краінах, куды выехалі сотні беларусаў, якія заявілі пра катаванні з боку сілавікоў. У Вільні будзе знаходзіцца каардынацыйны цэнтр праекта.
Дарадца Ціханоўскай Аляксандр Дабравольскі заявіў, што канчатковая мэта — крымінальны пераслед у Беларусі асоб, вінаватых у катаваннях, а прамежкавая — абвяшчэнне падазраваных у злачынствах у міжнародны вышук: «Мы запусцілі гэты праект у рамках «Народнага Трыбунала». Кожны, хто здзяйсняе злачынствы і б'е дубінкамі людзей, павінен панесці адказнасць і не здзіўляцца, калі яго імя з'явіцца ў спісах Інтэрпола», — адзначыў Дабравольскі.
