«Падняўся, прабег метраў пяць — і мне ў спіну трапіла куля». Праграміста падстрэлілі на разгоне Маршу ва Уруччы
Пасля маршаў 29 лістапада ў адзін са шпіталяў сталіцы паступіў 29-гадовы праграміст Дзмітрый Капусцёнак з кулявым раненнем. Ён расказаў «Нашай Ніве» пра падзеі нядзелі.
«Я ішоў у канцы калоны па вуліцы Астрашыцкай. Падыходзілі да моста на Незалежнасці, каля ўніверсама «Радзівілаўскі» пачаўся хапун. Людзі пабеглі, я таксама пабег, але спатыкнуўся і ўпаў.
Потым падняўся, прабег метраў пяць, і ў мяне трапіла куля — я адчуў удар у спіну і пачуў воплеск ззаду. Пры гэтым ніякіх сігналаў аб тым, што будуць страляць, я дакладна не чуў», — расказаў Дзмітрый.
Ён сцвярджае, што «прымалі вельмі жорстка» — у бусіку адзін з невядомых паставіў на яго нагу.
«Потым нас перасадзілі ў аўтазак, там шэсць чалавек запхнулі ў «стакан». У аднаго была астма. Яму стала вельмі кепска, мы малацілі ў дзверы, якія з іншага боку падпіралі тры чалавекі. У выніку іх усё ж адамкнулі, і той хлопец проста вываліўся, а людзі ў чорным смяяліся. Потым яны сказалі, што мы можам яго падняць, нехта падняў і падсунуў бліжэй да вентыляцыі. Яму стала лепш, так мы даехалі да Першамайскага РУУС», — кажа Дзмітрый.
Там ужо ён зразумеў, што са спінай не ўсё ў парадку, станавілася горш.
«Я думаў што нічога сур'ёзнага, але потым зразумеў, што цячэ кроў. Праз паўтары гадзіны папрасіў у міліцыі, каб апрацавалі рану — папшыкалі антысептыкам. Потым папрасіў, каб выклікалі хуткую. Яе то выклікалі, то не выклікалі, але ў выніку яна прыехала праз тры гадзіны. Мяне з канвоем забралі ў бальніцу, парабілі здымкі, вырашылі пакінуць на дадатковае абследаванне і ўчора адпусцілі. У міліцыі забралі тэлефон, склалі пратакол, цяпер чакаю позвы ў суд», — падсумаваў Дзмітрый.
Цяпер Дзмітрый ужо выйшаў на працу.
Цяпер чытаюць
Арыштаваны дырэктар Палаца Рэспублікі, адзін з арганізатараў Марафона адзінства6
Каментары