Сустрэча адбылася яшчэ 18 лістапада, пра гэта Юрый Васкрасенскі расказаў «Нашай Ніве».
«Гэта адбылося з дазволу следчых органаў. Я напісаў хадайніцтва ў следчае ўпраўленне КДБ, і яно было задаволена. Эдуард быў у добрым гуморы, добра выглядаў.
Я паведаміў яму, што займаюся пытаннем змянення яму меры стрымання. Больш за месяц таму я падаў адпаведнае хадайніцтва аб змяненні меры для Віктара і Эдуарда Бабарыкаў на хатні арышт пад маю паруку», — расказвае Юрый.
Візіцёра цікавіла, ці не будзе Эдуард супраць, каб той займаўся гэтай справай. Васкрасенскі кажа, што адмоўнага адказу не атрымаў. Агулам сустрэча доўжылася каля гадзіны. Паспелі абмеркаваць і грамадска-палітычныя тэмы.
«Ён пытаўся, што адбываецца «за сценамі», я расказаў пра няспынныя выхады людзей на вуліцы па нядзелях, расказаў пра наш «круглы стол», — кажа Васкрасенскі.
Ці ставіліся перад Эдуардам нейкія ўмовы для таго, каб ён мог выйсці з СІЗА? «Я асабіста нікому такіх умоў не ставіў. Якія ўмовы ставіць следства? Гэта ўжо пытанні да самога следства і абвінавачаных».
Васкрасенскі кажа, што моцна засмуціўся праз нядаўняе выказванне Паўла Латушкі пра тое, што Віктар і Эдуард Бабарыкі хутка могуць быць на волі.
«У пагоні за палітычным хайпам многія не разумеюць, што пэўныя рэчы трэба рабіць у цішыні. Хайпаваць ужо можна потым, калі ўсё гэта рэалізавалася. Логіка нашай улады такая, што яна нічога не робіць пад прымусам. Калі ідзе ціхі працэс па вызваленні Эдуарда Бабарыкі, а тут вылазіць нейкі апазіцыйны дзеяч, які кажа, што хутка Эдуард Бабарыка павінен быць на волі, то з логікі ўладаў гэты працэс можа адразу спыніцца.
Гэты працэс, які быў запушчаны і ўжо ішоў да лагічнага вырашэння, рэзка затармазіўся. Гэта вельмі далікатная тэма, і трэба разумець узровень адказнасці, калі ты пра нешта кажаш».
«Эдуард трымаецца добра, кажа, што цяжка лайдачыць. Ён чытае шмат кніг, перадае ўсім прывітанне, ні аб чым не шкадуе. Але паколькі ён чалавек актыўны, то яму ў гэтых чатырох сценках цяжка знаходзіцца без актыўнай дзейнасці. Адзінае, што ратуе і адцягвае, — гэта кнігі і перапіска», — расказвае Юрый.
«Наколькі я ведаю, Лаўроў не падымаў пытанне аб вызваленні Бабарыкі. Калі б ён падняў такое пытанне, то яно б было вырашана вельмі хутка, цягам дня», — мяркуе Васкрасенскі.
Факт такой сустрэчы «НН» пацвердзіла адвакатка Эдуарда Ірына Варанкова. Ні пра якія падрабязнасці спаткання яна расказваць не стала.
Эдуард Бабарыка — кіраўнік ініцыятыўнай групы прэтэндэнта ў кандыдаты на пасаду прэзідэнта Віктара Бабарыкі. Быў затрыманы 18 чэрвеня разам з бацькам, калі накіроўваўся ў ЦВК для здачы сабраных подпісаў. Затрыманне праводзіў Дэпартамент фінансавых расследаванняў. У гэты ж дзень Эдуард быў змешчаны ў СІЗА КДБ. 21 чэрвеня Эдуарду Бабарыку выставілі абвінавачванне паводле ч. 2 арт. 243 («Ухіленне ад выплаты сум падаткаў і збораў, што пацягнула шкоду ў асабліва буйным памеры»). Прызнаны палітычным вязнем.
Юрый Васкрасенскі — гэта былы сябра ініцыятыўнай групы Бабарыкі, які пасля выбараў апынуўся ў «амерыканцы». У хуткім часе з’явілася ягонае інтэрв’ю Марату Маркаву, якое ён даваў у статусе зняволенага. А на сустрэчы з Лукашэнкам Васкрасенскі сядзеў ад яго па правую руку. Літаральна на наступны дзень ён выйшаў на волю з даручэннем «падрыхтаваць прапановы па зменах у Канстытуцыю».
Цяпер чытаюць
Бедны, расчараваны — асабліва ў родных — і нікому непатрэбны. Злы дзённік Барадуліна дазваляе зазірнуць унутр генія19
Каментары