«Палітыку мы не кранаем». Яўген Перлін забраў ютуб-канал «Макаёнка, 9» і запускае на ім свой праект
Экс-тэлевядучы БТ Яўген Перлін запускае свой ютуб-праект — Perlin Show. На ім будуць з’яўляцца перадачы розных фарматаў.
«Першы фармат — вялікае інтэрв’ю. Не пра палітыку, а пра асобаў, тое, праз што яны праходзілі, каб стаць паспяховымі. Думаю, для кагосьці гэта будзе карысна, — дзеліцца Яўген. —
Палітыку мы не кранаем, таму што ёсць тыя, хто ўжо паспяхова гэта робіць.
Гэта не шоу, а падкаст. Можна паслухаць увечары перад сном ці ў дарозе. Першага інтэрв’ю — яно цягнецца 2,5 гадзіны — хопіць роўна на тое, каб даехаць з Мінска да Гродна».
Героем першага выпуску стаў дызайнер Апці Эзіеў.
Пазней на канале будуць і іншыя праекты, але, як кажа сам Яўген, пакуль кожную нядзелю такія навіны, не да забаўляльных фарматаў.
На канале Перліна пакуль ніводнага відэа — але амаль 43 тысячы падпісантаў. Як так?
«Я нічога не купляў! — усміхаецца вядучы. — Гэта быў адзін з маіх каналаў, я яго проста перафарматаваў».
Як высветлілася, Перлін робіць свой праект на канале, які застаўся ад шоу БТ «Макаёнка, 9». Усе старыя відэа цяпер схаваныя.
Ютуб-канал для вядучага — пакуль асноўны занятак. Пасля звальнення з БТ Перлін нікуды не ўладкоўваўся. Кажа, цяпер ідуць перамовы наконт адной прапановы, але раскрываць карты рана.
Каментары