На сустрэчы ў Мінску 28 мая Аляксандр Лукашэнка і Уладзімір Пуцін «абмеркавалі тыя праблемныя пытанні, якія існуюць у адносінах дзвюх краін», паведамляе прэс‑служба прэзідэнта Беларусі.
У цэнтры ўвагі прэзідэнтаў таксама знаходзіліся «праблемы, якія тычацца сусветнага фінансава‑эканамічнага крызісу», адзначаецца ў прэс‑рэлізе.
«Думаю, наша сустрэча ў Мінску, як і заўсёды, будзе карыснай і прадуктыўнай і гэтым разам», — цытуе Лукашэнку яго прэс‑служба.
Адной з найважнейшых праблем беларуска‑расійскіх адносінаў называецца «выкананне расійскім бокам рашэнняў, прынятых паводле вынікаў лютаўскага пасяджэння Вышэйшага дзяржсавета Саюзнай дзяржавы Беларусі і Расіі».
«На жаль, даводзіцца канстатаваць, што рэалізацыя дамоўленасцей, дасягнутых на вышэйшым узроўні, пакуль тармозіцца, і адбываецца гэта зусім не па віне Мінска, — падкрэсліваецца ў прэс‑рэлізе. — Беларускія тавары з вялікай цяжкасцю прабіваюцца на расійскія рынкі, нягледзячы на адзіную эканамічную прастору, магутнейшую прамысловую кааперацыю, якая прадвызначае значную долю расійскага прадукту ў беларускіх таварах».
Уладзімір Пуцін, паведамляе прэс‑служба, «выказаў надзею на захаванне дынамікі беларуска‑расійскага тавараабароту ў перыяд сусветнага крызісу».
«Што да бягучых спраў у эканоміцы, то мы здолелі зрабіць шмат. Агульнымі намаганнямі нам удалося збіць тэмпы падзення тавараабароту паміж нашымі краінамі насуперак сусветнаму крызісу», — сказаў Пуцін.
«Сёння на пасяджэнні саюзнага Саўміна, — дадаў ён, — мы падумаем, што зрабіць дадаткова для таго, каб канчаткова спыніць гэтае падзенне тавараабароту і выйсці на станоўчую дынаміку».
Пуцін, паведамляе прэс‑служба, павіншаваў Лукашэнку з абраннем Беларусі краінай правядзення чэмпіянату свету па хакеі ў 2014 годзе: «Гэта добрая навіна і для Беларусі, і для Расіі. Нягледзячы на ўсе праблемы, звязаныя з крызісам, гэтая падзея — пазітыўны сігнал, які гаворыць аб тым, што мы глядзім у будучыню».
