Міністэрства аховы здароўя Ізраіля паведаміла, што вакцынавана 19,5% насельніцтва, у тым ліку больш за 72% людзей, якім больш за 60 гадоў. Чакаецца, што да сярэдзіны сакавіка вакцыну атрымаюць прыкладна 5 мільёнаў з 9 мільёнаў грамадзян краіны, перадае Reuters.
Паводле даных сайта Our World in Data, які вядзе даследчая арганізацыя Oxford Martin School, узровень вакцынацыі ў Ізраілі з'яўляецца самым высокім у параўнанні з астатнім светам. На другім месцы — Аб'яднаныя Арабскія Эміраты, якія па стане на нядзелю зрабілі прышчэпкі 10% свайго насельніцтва, за імі ідуць Бахрэйн і ЗША з 5% і 2% адпаведна.
Ізраіль спадзяецца паскорыць узровень вакцынацыі да 170 000 у дзень з цяперашніх 150 000, каб выйсці з пандэміі ўжо ў лютым.
Ізраіль паралельна зрабіў больш жорсткім рэжым ізаляцыі, каб стрымаць усплёск выпадкаў захворвання на каранавірус. Чыноўнікі кажуць, што празмерны давер грамадскасці да вакцыны, магчыма, прывёў да слабасці ў іншых мерах засцярогі і актывацыі новых інфекцый.
