Начальнік выбарчага штаба Любові Собаль на выбарах у Дзярждуму Вольга Ключнікава пасля адміністрацыйнага арышту выявіла ў сваім айфоне праслухоўваючую прыладу. Пра гэта Собаль паведаміла ў відэа, апублікаваным у ютуб-канале «Навальный Live», піша meduza.io.

21 снежня Ключнікаву затрымалі каля дома меркаванага супрацоўніка ФСБ Расіі Канстанціна Кудраўцава, верагоднага ўдзельніка атручвання Аляксея Навальнага. Разам з ёй таксама затрымалі аператара «Навальны Live» Акіма Керымава. Абодвух абвінавацілі ў непадпарадкаванні паліцыі, яны правялі пад арыштам па сем сутак.

Пасля выхаду са спецпрыёмніка Керымаў не змог атрымаць свой тэлефон, у той жа час Ключнікавай тэлефон вярнулі, распавяла Собаль.

«Гэта было дзіўна. І таму мы прыгледзеліся да тэлефона лепей і выявілі там праслухоўку», — паведаміла яна.

Вольга Ключнікава ўдакладніла «МБХ медыя», што знайшла «жучок» яшчэ ў спецпрыёмніку, калі ёй у чарговы раз выдалі тэлефон на 15 хвілін, каб пагаварыць з роднымі. «На ім былі скручаныя балты (раней тэлефон не ўскрываўся), а таксама прылада прыкметна збоіла: дадаткі запускаліся і зачыняліся самі па сабе», — распавяла яна.

Ключнікава дапускала, што тэлефон неахайна ўскрылі супрацоўнікі ФСБ.

Хочаш падзяліцца важнай інфармацыяй ананімна і канфідэнцыйна?