Арцёма Мядзведскага абвінавачвалі ў здзяйсненні дзеянняў, якія груба парушаюць грамадскі парадак (арт. 342 КК РБ). Яго прызналі вінаватым па гэтым артыкуле і прысудзілі да трох гадоў абмежавання волі з накіраваннем ў папраўчую ўстанову адкрытага тыпу («хімія»). Менавіта столькі і прасіў на папярэднім пасяджэнні пракурор, піша spring96.org.
Таксама суддзя пастанавіла залічыць у тэрмін пакарання яго знаходжанне пад вартай з 19 кастрычніка па 15 студзеня ў суадносінах «адзін дзень пад вартай за два дні абмежавання волі».
Арцёма Мядзведскага вызвалілі ў залі суда пад падпіску аб нявыездзе.
Акрамя таго суддзя вынесла прыватнае вызначэнне на адрас кіраўніцтва «Бургер Сіці», дзе працуе Мядзведскі, у якім просіць арганізаваць прафілактычную працу аб недапушчальнасці здзяйснення злачынстваў.
Арцём Мядзведскі быў затрыманы 19 кастрычніка. Спачатку яму было прад'яўлена абвінавачванне па ч. 2 арт. 293 КК РБ (удзел у масавых беспарадках), затым справу перакваліфікавалі ў групавыя дзеянні, якія груба парушаюць грамадскі парадак (арт. 342 КК РБ). Арцёма абвінавацілі ў тым, што ён ўвечары 10 жніўня ўдзельнічаў у акцыі пратэсту каля ст. м. Пушкінская, выкаціў на дарогу камень, што прывяло да блакавання праезнай часткі.
