26-гадовага Яўгена Харашкевіча затрымалі 19 студзеня ранкам, расказвае ягоная жонка Ніна. «Быў мароз, і муж выйшаў раней з хаты хвілін на пяць за мяне, каб прагрэць аўтамабіль. Калі я выходжу, то ён ішоў наперадзе, а за ім два ці тры чалавекі, не ў кайданках, нічога. Сказаў, што затрымліваюць.

Пазней у нас дома праводзілі ператрус супрацоўнікі ГУБАЗіКа, канфіскавалі мой ноўтбук, камп’ютар мужа. Жэня таксама займаецца страйкболам, то забралі тры аўтаматы і адзін пісталет страйкбольныя. Таксама муж крыху займаецца майнінгам, апісалі відэакарты, але пакінулі дома. Хацелі канфіскаваць грошы і карткі банкаўскія, але пакінулі, бо не ведаю, за кошт чаго б я тады жыла», — расказвае Ніна Харашкевіч.

Ніна і Яўген Харашкевічы. Фота прадставіла Ніна

Самога Яўгена адразу адвезлі ў Віцебск на допыт у Следчы камітэт, а потым было вырашана пакінуць яго пад вартай. Вобшук праводзіўся ў рамках крымінальнай справы, заведзенай па двух артыкулах. А што стала падставай?

«Як я зразумела, гаворка пра абразу Наталлі Петуховай. Мы з ёй з адной вёскі Свяча Бешанковіцкага раёна, я яе троху ведаю», — кажа жанчына.

Наталля Петухова спачатку сама вучылася ў Акадэміі МУС, а потым засталася там працаваць выкладчыцай фізічнага выхавання, за час вучобы яна не раз паказвала добрыя вынікі ў бегу.

Яўген Харашэвіч да снежня 2020 года працаваў кіроўцам на Полацкім малочным камбінаце, але потым яму вырашылі не працягваць кантракт. Жонка кажа, што начальству не спадабалася, калі Харашэвіч вырашыў стаць незалежным назіральнікам на выбарах 9 жніўня. Яму доўга не давалі выхадны, але мужчына знойшоў шлях, як выкруціцца — пайшоў здаў кроў у якасці донара, а на наступны дзень яму прадугледжваўся выхадны. Яўген адразу паехаў у вёску Фарынава Полацкага раёна, адкуль родам, каб там назіраць за выбарамі.

12 жніўня Харашэвіча затрымалі проста на тэрыторыі камбіната, нібыта ён заклікаў людзей ехаць у Мінск падтрымаць пратэсты. Праўда, ужо праз два дні вызвалілі, калі адпускалі ўсіх палітзняволеных, што сядзелі па адміністрацыйных артыкулах. У выніку Яўгена нават апраўдалі па гэтым «правапарушэнні».

За апошнія паўгода Харашэвіча двойчы выклікалі ў Следчы камітэт для дачы паказанняў. Спачатку за бойку з АМАПам, якая была 10 жніўня ў Наваполацку, але Яўген у той дзень быў у камандзіроўцы ў Глыбоцкім раёне. Паказвалі розных людзей, пыталіся, ці пазнае каго. А ў снежні правялі размову адносна «дэструктыўных паведамленняў» у тэлеграме, але не затрымлівалі.

У снежні з’явіўся зліў BYPOL аб людзях, якія знаходзяцца ў распрацоўцы ГУБАЗіКа, сярод іх быў і Яўген Харашэвіч. «Межы закрываліся літаральна праз пару дзён, у нас было зусім мала часу на тое, каб прыняць рашэнне. Усё ж вырашылі нікуды не з’язджаць, я на той момант была на чацвёртым месяцы цяжарнасці, дый з грашыма не так усё добра», — расказвае Ніна.

Прэс-служба МУС паведаміла, што на Харашэвіча выйшлі супрацоўнікі віцебскага ГУБАЗіКа ў рамках «пошуку асобаў з экстрэмісцкімі поглядамі, якія падтрымліваюць прыхільнікаў масавых беспарадкаў».

Усяго па розных палітычна матываваных крымінальных справах у Беларусі праходзяць каля 1000 чалавек, 189 з іх праваабаронцы ўжо афіцыйна прызналі палітвязнямі.

Хочаш падзяліцца важнай інфармацыяй ананімна і канфідэнцыйна?