На думку аўтараў даклада, у Байдэна ёсць «гістарычная магчымасць аб'яднаць Еўропу і пераламаць дыктатуру, стварыўшы міжнародную кааліцыю ў падтрымку дэмакратыі ў Беларусі», піша tut.by.

Аўтары даклада — журналіст і дыпламат Андрэс Ослунд, намеснік дырэктара Еўразійскага цэнтра Атлантычнай рады Мелінда Хэрынг, былы амбасадар ЗША ва Узбекістане і Украіне Джон Хербст і экс-амбасадар ЗША ў Расіі, былы намеснік генеральнага сакратара NATO Аляксандр Вершбоў.

У дакладзе — шэраг рэкамендацый для Байдэна, каб «садзейнічаць росту дэмакратычнага руху ў Беларусі, умацаваць цяперашняга лідара апазіцыі і аслабіць падтрымку Лукашэнкі».

Аўтары мяркуюць, што Байдэн павінен сустрэцца са Святланай Ціханоўскай у першыя 100 дзён на пасадзе прэзідэнта ЗША. Прэзідэнту рэкамендуюць прызначыць высокапастаўленага чыноўніка для каардынацыі з ЕЗ, Вялікабрытаніяй і Канадай сумесных дзеянняў па санкцыях, а таксама падпісаць указ аб санкцыях супраць «сотняў беларускіх чыноўнікаў, якія парушаюць правы чалавека, каб гэта служыла стрымліваючым фактарам далейшай эскалацыі рэпрэсій». Аўтары адзначаюць, што гатовыя прадставіць спіс для разгляду.

«Злучаныя Штаты павінны называць Лукашэнку былым прэзідэнтам Беларусі. Амбасадар ЗША ў Беларусі Джулі Фішэр павінна заняць свой пост у Мінску і наведаць Вільню па меры неабходнасці, але не ўручаць Лукашэнку свае даверчыя граматы. ЗША варта ўвесці санкцыі ў дачыненні да кампаній, якія займаюцца прыватнымі фінансамі Лукашэнкі. ЗША павінны пагражаць санкцыямі расійскім кампаніям і бізнэсменам ў выпадку, калі яны захопяць беларускія кампаніі ці падтрымаюць рэжым Лукашэнкі фінансава або палітычна. ЗША таксама павінны ўвесці санкцыі супраць расійскіх СМІ і журналістаў, якія ўдзельнічаюць у прапагандысцкіх кампаніях супраць пратэснага руху ў Беларусі», — сказана ў дакуменце.

Там таксама адзначана, што Кангрэс ЗША павінен даць канкрэтныя ўказанні Дзярждэпартаменту, каб ён штогод выдаткоўваў не менш за 200 млн даляраў на падтрымку грамадзянскай супольнасці Беларусі і СМІ. Кангрэсу рэкамендавана падвоіць бюджэт Беларускай службы «Радыё Свабода».

«Дзяржсакратар павінен прызначыць высокапастаўленую службовую асобу, якая будзе кантраляваць усю дапамогу Беларусі і штоквартальна даваць справаздачу аб ёй перад Кангрэсам. ЗША (разам з ЕС) павінны накіраваць гуманітарную дапамогу апазіцыі па каналах, якія фактычна даходзяць да іх у Беларусі. Дзяржсакратар павінен садзейнічаць безумоўнаму вызваленню і амністыі ўсіх палітычных зняволеных, заклікаць да спынення гвалту і настойваць на ўсебаковым нацыянальным дыялогу для вырашэння палітычнага крызісу ў Беларусі і правядзенні ў наступным свабодных і справядлівых выбараў», — прапануюць аўтары.

Акрамя таго, ЗША прапануецца выкарыстоўваць свой уплыў у міжнародных арганізацыях, такіх як АБСЕ і ААН, для іх удзелу ў вырашэнні беларускага крызісу.

У дакуменце таксама пазначаны рэкамендацыі для кіравання «рэакцыяй Расіі на падзеі ў Беларусі з мэтай прадухілення рэпрэсій з боку Крамля».

Атлантычная рада — амерыканскі аналітычны цэнтр, створаны для заахвочвання супрацоўніцтва паміж ЗША і Заходняй Еўропай. Рада заснаваная ў 1961 годзе пры NATO. Юрыдычна рада не звязаная з урадам ЗША ці NATO. На мерапрыемствах арганізацыі часта выступаюць амерыканскія палітыкі і чыноўнікі, у тым ліку экс-прэзідэнты, а таксама супрацоўнікі NATO.

Хочаш падзяліцца важнай інфармацыяй ананімна і канфідэнцыйна?