spring96.org
Іх вінавацілі ва ўдзеле ў несанкцыянаваным пікетаванні ў лесе пад Віцебскам, іх тады затрымалі са скандынаўскімі палкамі для хадзьбы ў лесе.
Суддзя Вераніка Барысава скасавала тую справу праз недаказанасць віны, паведамляе «Віцебская вясна».
«Выснова аб недаказанасці віны згаданых асоб ва ўчыненні адміністрацыйнага правапарушэння была зробленая заўчасна, без належнага даследавання абставін правапарушэння», — гаворыцца ў пратэсце пракуратуры, накіраваным у Віцебскі абласны суд.
Паводле пракурора Дубава, суддзя мусіла апытаць яшчэ сведак-міліцыянтаў, якія выязджалі ў лес, калі атрымалі «паведамленне аб учыненні правапарушэння» (Мілянцей, Ермаковіч, Барысаў), а таксама астатніх супрацоўнікаў АУС, якія «выбылі па выкліку на месца».
«Падчас даследавання доказаў у справе не выяўлена, хто з супрацоўнікаў АУС знайшоў бел-чырвона-белы сцяг, не ўстаноўленая ягоная прыналежнасць, не знятыя супярэчнасці ў тлумачэннях сведак аб месцы, дзе яго знайшлі, а таксама не знятыя супярэчнасці аб часе і працягласці знаходжання затрыманых на месцы ўчынення адміністрацыйнага правапарушэння», — пералічвае «заганы» суда пракуратура.
Пратэст пракурора мусіць разгледзець абласны суд: альбо адхіліць яго, альбо задаволіць і накіраваць справу Таццяны Севярынец і Алены Касновай на новы разгляд.
Нагадаем, справу 19 студзеня разглядала суддзя Вераніка Барысава. Пасля скасавання справы яна прынесла жанчынам афіцыйныя прабачэнні. 20 студзеня суддзя Уладзімір Царыкаў (суд Кастрычніцкага раёна) з такой жа фармулёўкай («праз недаказанасць віны») спыніў справу яшчэ трох удзельніц так званага «пікета ў лесе» — Раісы Кухто, Людмілы Камінскай і Людмілы Валадкевіч. Але Царыкаў прабачэння не прасіў.