Блогер анансаваў гэта відэа як «інтэрв’ю з наступным прэзідэнтам Беларусі». Што цікавага расказаў Латушка?
Асноўнымі кірункамі сваёй дзейнасці Латушка назваў стварэнне Адзінай кнігі рэгістрацыі злачынстваў, Народныя пасольствы, адмена Чэмпіянату свету па хакеі ў Беларусі.
Кіраўнік НАУ агучыў звесткі, што ўсе буйныя чыноўнікі краіны атрымліваюць па сакрэтнай ведамасці дадатковы заробак.
«Ні многа ні мала — 600 еўра штомесяц. Гэта сакрэтная ведамасць, індывідуальная. Кожны з іх можа атрымліваць больш. Прэм'ер можа атрымліваць і тысячы [еўра], кіраўнік парламента — тысячы, міністр — 600. Самае цікавае, што дадатковая зарплата ў канверце не выплачваецца ў беларускіх рублях, а менавіта ў еўра», — адзначыў Латушка.
Ён прызнаў, што таксама атрымліваў такія заробкі, аднак лічыць, што ў будучыні ўсе павінны будуць заплаціць з яго падатак.
«Падтрымкі Лукашэнкі ўжо няма сярод чыноўнікаў. Сістэма знутры згніла, я не ведаю, што з гэтым будзе рабіць КДБ, але змяніць увесь дзяржапарат будзе немагчыма», — лічыць былы міністр культуры.
«Давайце глянем на нарады, якія адбываюцца пад кіраўніцтвам Лукашэнкі. Сядзяць людзі ў пагонах, а калі не ў пагонах, то пад цывільнымі пінжакамі свецяцца зорачкі. І ён вяшчае адзін, ён нікога не чуе і ўжо не пачуе. Ён жыве ва ўласным свеце, вельмі замкнутай прасторы. Нават сярод сваіх сяброў ён пастаянна бачыць здрады, выганяе кагосьці, набліжае, я многіх з іх ведаю, але яны зніклі, іх больш няма, хаця яны дзесьці жывуць», — падзяліўся сваім меркаваннем Латушка.
«Я застаюся моцным духам і ўпэўнены ў тым, што раблю. Ні секунду, ні імгненне я не сумняюся ў тым, што ўсё раблю правільна. І мяне вельмі часта падтрымліваюць купалаўцы.
У жніўні я не разумеў, што ўсё залежыць ад цябе. Ты павінен стаць наперадзе калоны і паказаць, што ідзём налева. Я тады думаў, што хтосьці гэтым кіраваў, а ў сапраўднасці не кіраваў ніхто.
У сістэмы вельмі шмат трэшчын ужо, у адзін момант яна рассыплецца ў парашок, у пыл. НАУ гатовая ўзяць на сябе адказнасць за будучыню краіны, мы разумеем усе рызыкі, што тыя першыя, хто выходзіць, магчыма, будуць змеценыя з палітычнай арэны, яны хутчэй страцяць, чым набудуць, але тут пытанне не амбіцый, а адказнасці», — сказаў Павел Латушка.
