«Была ўпэўненая, што тэлефануюць аферысты». Супрацоўніца БДУ стала гераіняй інтэрнэту, калі сказала ў жывым эфіры «Свабоду народу!»
У сацсетках распаўсюджваецца відэа, на якім жанчыну віншуюць з выйгрышам машыны ад крамы «Віталюр». Жанчына спачатку не верыць у сваё шчасце і на пытанне, што б яна хацела выйграць, шчыра адказвае: «Свабоду народу!»
«Наша Ніва» знайшла жанчыну, якая стала гераіняй інтэрнэту.
Наталля Прытулік спачатку не паверыла, што знаходзіцца ў жывым эфіры і што яна сапраўды выйграла аўто.
«Цяпер жа шмат папярэджваюць, што людзям тэлефануюць аферысты, трэба быць асцярожнымі. Ну і я так адказала, бо была ўпэўненая, што гэта аферысты, — кажа Наталля. —
Але ж я і на самай справе хачу свабоду народу. І каб я ведала, што гэта не махляры — усё роўна б паўтарыла пра свабоду. Бо мне не падабаецца, што ідуць несправядлівыя суды, што студэнтаў і школьнікаў судзяць, судзяць журналістаў. Што ў нас беззаконне і прававы дэфолт — канечне, мне гэта не падабаецца. Усе мы жывыя людзі, і для нармальнага чалавека, які думае, гэта ўсё непрымальна.
Я сама на сутках не была, блізкія таксама. Але я чытаю навіны і прымаю ўсё блізка да сэрца. Чытала пра суд над хлопцам-інвалідам, у якога ў 21 год разумовае развіццё як у сямігадовага, калі ён плакаў і казаў: «Мама, я не хачу!». Пасля я так расстроілася, што прымала супакойлівыя таблеткі.
Мяне вельмі засмучвае такое стаўленне адных людзей да іншых. Бо і тыя ж людзі, і гэтыя! Чаму людзі, у якіх улада ў руках, так ставяцца да сваіх жа людзей? Для мяне гэта непрымальна!
Але ж і вядоўца сказаў, што згодны са мною! Кажа: спачатку аўто, пасля свабода!»
Жанчына працуе ў БДУ, на кафедры клетачнай біялогіі і біяінжынерыі раслін. Ці не будзе ў яе праблем пасля смелых выказванняў?
«А што я такога зрабіла? — дзівіцца Наталля. — Так, сказала «Свабоду народу». Дык а што, народ цяпер свабодны? Не».
Наталля кажа, што сям’я ёй усё яшчэ не верыць — лічаць, што маці падманулі нейкія махляры. Тым часам праз пару дзён жанчына зможа даказаць праўду, атрымаўшы каштоўны падарунак. «Сказалі, каб я на сераду нічога не планавала — паедзем па машыну», — кажа Наталля.
Цяпер чытаюць
«Я гатовая стаць міністрам эканомікі Беларусі». Новы твар у Кабінеце Аліса Рыжычэнка — пра карупцыю на карысць Лукашэнак, Зарэцкую і рэформы47
Каментары