Звярніце ўвагу на фота. Яно публікуецца ўпершыню. Яно было зробленае ў тыя жнівеньскія дні, калі пад ціскам грамадства сілавікі сышлі з вуліц і людзі свабодна выражалі сваю пазіцыю

Хлопца вызваляюць у зале суда. Івана прызналі вінаватым па ч. 1 арт. 342 Крымінальнага кодэкса і абвінавацілі ў перакрыцці дарог у ноч з 10 на 11 жніўня на «Рызе», што пацягнула шкоду «Мінсктрансу» на суму больш за 5,6 тысячы рублёў. На судзе стала вядома, што тэлефон хлопца праслухоўваўся яшчэ з 3 сакавіка 2020 года, менавіта тэлефонныя размовы з акцыі пратэсту і ляглі ў аснову абвінавачвання Івана. Справу палітвязня разглядала суддзя Марына Фёдарава. 

Івана Красоўскага абвінавацілі ў тым, што ў ноч з 10 на 11 жніўня 2020 года каля ГЦ «Рыга» «падчас незаконнага масавага мерапрыемства публічна выкрыкваў лозунгі, блакаваў рух транспарту шляхам перакрыцця праезнай часткі. Пасля чаго, нягледзячы на патрабаванні праваахоўнікаў, адмовіўся пакінуць яе, заклікаў да аналагічных дзеянняў іншых грамадзян». Па версіі абвінавачвання, гэта пацягнула працяглае парушэнне грамадскага спакою, стварыла перашкоды для нармальнай працы транспарту на працягу 5 гадзін на вуліцы Сурганава, чым было абмежавана права іншых грамадзян на спакойную працу, адпачынак і свабоднае перамяшчэнне. У выніку дзеянняў абвінавачанага маёмасці КТУП «Мінсктранс» нанесеная шкода на суму больш за 5,6 тысячы. 

Хлопца затрымалі першы раз 12 жніўня, тады сілавікі моцна збілі яго да стану інваліднага вазка. Другі раз Івана затрымалі ў канцы верасня — ужо ў межах крымінальнай справы па ч. 2 арт. 293 Крымінальнага кодэкса. Потым справу Івана перакваліфікавалі на больш мяккі артыкул — на ч. 1 арт. 342 Крымінальнага кодэкса.

Віну Іван прызнаў часткова. Ён прызнае толькі тое, што выкрыкваў лозунгі і пляскаў у далоні. Таксама Красоўскі не прызнаў грамадзянскі пазоў.

На судзе Красоўскі сказаў:

«Я малады чалавек 18 гадоў, нядаўна скончыў школу, тое, што я ўбачыў на Рызе, — я ўбачыў упершыню ў жыцці, я быў на эмоцыях. Гэта ненармальна, калі супрацоўнікі міліцыі збіваюць людзей, супрацоўнікаў хуткіх».

Дзяржаўная абвінаваўца памочніца пракурора Савецкага раёна Анастасія Маліко папрасіла суд пакараць Івана Красоўскага трыма гадамі «хіміі». Менавіта такое пакаранне і прызначыла суддзя Марына Фёдарава.

Хочаш падзяліцца важнай інфармацыяй ананімна і канфідэнцыйна?