Планаваная на сёлета 3-я водная міжнародная экспедыцыя па Віліі па слядах графа Тышкевіча з Вілейкі да Вільні пройдзе толькі да беларускай мяжы.
Аб гэтым расказаў па тэлефоне карэспандэнту «РГ» кіраўнік яе Міхаіл Петух:
‑ На жаль, ні беларусам не далі сёлета літоўскія візы, ні літоўцам — беларускія. Такая вось «узаемнасць» атрымалася.
Але экспедыцыя стартавала. 7 чэрвеня ў 14.00 ад Вілейкі адправіліся 10 чалавек. Раніцай 9‑га, калі яны набліжаліся да Смаргоні, Міхаіл Петух казаў, што да іх вось‑вось павінны далучыцца яшчэ і смаргонцы:
‑ І нас будзе ўжо каля 30‑ці.
Экспедыцыя, якую сёння прысвяцілі памяці заўчасна трагічна загінулага аднаго з ініцыятараў яе правядзення з 2007 года Віталя Кастэнкі, на думку Петуха, турысты закончаць 14‑га чысла ў Быстрыцы, калі на тое будзе дазвол беларускіх памежнікаў. Гранічны з Літвой пункт Быстрыца ўваходзіць у прыгранічную зону.
Мы па‑ранейшаму ставім перад сабой не толькі турыстычныя, а і даследчыя мэты, — сказаў карэспандэнту сп. Міхаіл. — Але пра гэта раскажу крыху пазней. Выбачайце, проста вельмі ашчаджаю тут у паходных умовах батарэю свайго мабільніка.
