Прыйшоў ГУБАЗіК, пытаўся пра супрацоўніцтва са Сцяпанам Пуцілам. Што за затрыманні былі ў інтэрнаце БДУ?
Сёння ў Мінску прайшлі затрыманні актывістаў і адміністратараў тэлеграм-чатаў. Сярод затрыманых аказаліся магістранты гістфака БДУ — Аляксандр Паршанкоў і Аляксандр Новікаў. Паршанкова праз нейкі час адпусцілі, ён распавёў «Нашай Ніве», што адбывалася.
«Я ўзначальваю вольны прафсаюз студэнтаў БДУ, Саша туды таксама ўваходзіць. Мы з ім найлепшыя сябры. Разам жывём у пакоі, разам праходзілі Жодзіна.
Сёння да нас а 7-й раніцы прыйшлі ў інтэрнат з ГУБАЗіКа. Сказалі: тэхніку збірайце і едзем. Па якой справе, у якім статусе — не тлумачылі. З намі паводзілі сябе ветліва. У выніку тэхніку праглядзелі і аддалі. Мне вынеслі папярэджанне аб наступствах удзелу ў масавых мерапрыемствах і адпусцілі».
Новікаву пашанцавала менш — яго адправілі на Акрэсціна. У чым справа, яго сябар дакладна не ведае. Міліцыя запісвала Новікава на відэа, пыталася пра супрацоўніцтва з каналам Сцяпана Пуцілы.
Тэлеграм-канал вольнага прафсаюза БДУ быў узламаны, адтуль выдалілі падпісантаў. Цяпер доступ да канала вярнуўся стваральнікам.
Каментары