Ад 3 да 4,5 гады калоніі. У Брэсце запрасілі тэрміны для дзевяці чалавек па справе аб масавых беспарадках

На лаве падсудных — адразу дзевяць чалавек: бацька і сын, таксіст, студэнт, школьнік і іншыя. Пацярпелымі па справе прызнаныя 29 чалавек, большасць з іх — міліцыянты, шкоду ацанілі ў 27 тысяч рублёў. Справу разглядае суддзя Вера Філонік. 

Віну цалкам не прызнаў ніхто. 2 сакавіка дзяржабвінаваўца запрасіў пакаранне для абвінавачаных — для ўсіх пазбаўленне волі ад трох гадоў да чатырох з паловай, нават для школьнікаў, піша «Вясна».

Пракуроры лічаць, што віна ўсіх абвінавачаных ва ўдзеле ў масавых беспарадках 10 жніўня па ч. 2 арт. 293 Крымінальнага кодэкса даказаная, і запросілі наступныя тэрміны:

• палітзняволены таксіст Цімур Рызапур — 4,5 года калоніі ўзмоцненага рэжыму;
• палітвязень Аляксандр Драздоў — 4,5 года калоніі ўзмоцненага рэжыму;
• палітзняволены студэнт Ілля Мігно — 4,5 года калоніі ўзмоцненага рэжыму;
• палітзняволеныя сын і бацька Ягор і Віталь Пракапчукі — па 4 гады калоніі ўзмоцненага рэжыму;
• Сяргей Салоха (30-гадовы ІП) — 4 гады калоніі ўзмоцненага рэжыму; 
• палітвязень Сяргей Крыўчэня — 3,5 года калоніі ўзмоцненага рэжыму;
• Сяргей Гацкевіч (непаўнагадовы 11-класнік) — 3 гады выхаваўчай калоніі; 
• Дзяніс Хазей (непаўнагадовы другакурснік каледжа) — 3 гады выхаваўчай калоніі.

Двое з фігурантаў справы — непаўналетнія, да суда яны знаходзіліся пад наглядам. У судзе прысутнічалі іх маці, а таксама педагог. Семь абвінавачаных знаходзяцца пад вартай.

Віну цалкам не прызнаў ніхто. Большасць прызнаюць сябе вінаватымі часткова: «Прысутнічаў, удзельнічаў, але нікому не прычыняў гвалту, пагромаў не здзяйсняў».

Паводле абвінавачання, 10 жніўня 2020 года падчас несанкцыянаванага масавага мерапрыемства ў цэнтры Брэста — на вуліцах Савецкай і Нафтавай, бульварах Шаўчэнкі і Касманаўтаў, праспекце Машэрава — «груба парушылі грамадскі парадак і здзейснілі пагромы. Пасля чаго ўжылі гвалт — нанеслі супрацоўнікам міліцыі ўдары рукамі і нагамі, рознымі прадметамі. У ход для гэтага ішлі дошкі, палкі, вулічныя скрыні для смецця, фрагменты лавак, тратуарнай пліткі і асфальту, бутэлькі, камяні, металічныя балты, ёмістасці з фарбай, піратэхнічныя вырабы. Затым абвінавачаныя наўмысна знішчылі і пашкодзілі транспартныя сродкі і іншую маёмасць, што належала АУС, фізічным і юрыдычным асобам».

Паводле абвінавачання, супрацоўніку органаў унутраных спраў прычыненыя цялесныя пашкоджанні ў выглядзе дзвюх ран у галіне першага пальца правай кісці, якія адносяцца да катэгорыі лёгкіх цялесных пашкоджанняў, і нанесеныя пабоі. Яшчэ ў аднаго супрацоўніка сарвалі рацыю і адарвалі пагоны, а ўсяго больш за 25 міліцыянтаў заявілі пра пабоі.

3 сакавіка ў судовых спрэчках яшчэ выступяць адвакаты. Пасля гэтага прызначаць дату абвяшчэння прысуду.

• 0
• 0
• 0
• 0
• 0
• 0
• 0
• 0