Фота Надзеі Бужан

«Па выніках пасяджэння Калегіі Еўразійскай эканамічнай камісіі прынята рашэнне паведаміць Рэспубліцы Беларусь аб неабходнасці выканання права Еўразійскага эканамічнага саюза» — сказана ў заяве.

Калегія ЕЭК прызнала бар'ерам на ўнутраным рынку ЕАЭС патрабаванне пра абавязковы асартымент беларускіх тавараў на паліцах у крамах рознічнага гандлю краіны.

Беларускаму ўраду прапанавана «на працягу 30 каляндарных дзён з даты ўступлення рашэння ў сілу забяспечыць ліквідацыю наяўных парушэнняў і праінфармаваць Камісію аб прынятых мерах».

Міністэрства антыманапольнага рэгулявання і гандлю (МАРГ) Беларусі рэкамендуе рытэйлерам пры рэалізацыі (пастаўцы) харчовых тавараў, у тым ліку сацыяльна значных, забяспечыць дасягненне ўдзельнай вагі харчовых тавараў айчыннай вытворчасці ў аб'ёме рознічнага тавараабароту арганізацыі па выніках 2021 года на ўзроўні не ніжэй за 80-85%. Акрамя таго, беларускія тавары варта выкладваць у крамах «у візуальна і фізічна даступных месцах».

12 лютага на УНС Аляксандр Лукашэнка выказаў прэтэнзію ў адрас гандлёвых сетак аб тым, што яны недастаткова актыўна прадстаўляюць беларускія тавары аддаючы перавагу імпартным. Адну з такіх сетак, па яго словах, ужо пачалі «выразаць».

Услед за гэтым Камітэт дзяржкантролю пайшоў з праверкамі ў буйныя гандлёвыя сеткі — як у Мінску, так і ў рэгіёнах. Асаблівую ўвагу кантралёры мелі намер надаць імпартным таварам і наяўнасці беларускіх. «Па выніках кантрольна-аналітычных мерапрыемстваў будзе дадзена ацэнка прыманых органамі дзяржаўнага кіравання мер па абароне інтарэсаў айчынных вытворцаў і скарачэння аб'ёму імпартаваных тавараў», — казалася ў заяве КДК.

Шмат тавараў пастаўляецца ў Беларусь з Расіі, дзе размясцілі свае вытворчасці ў тым ліку і транснацыянальныя карпарацыі.