Архіўнае фота са студэнцкіх пратэстаў у Мінску
5 сакавіка прадстаўнікі сілавых структур уварваліся на афіцыйнае мерапрыемства зарэгістраванага ў Беларусі Свабоднага прафсаюза Беларускага, якое праходзіла ў бізнэс-клубе «Імагуру», і затрымалі каля 30 чалавек.
Сярод затрыманых апынуўся сябра Каардынацыйнай рады і сустаршыня аргкамітэта па стварэнні партыі «Беларуская хрысціянская дэмакратыя» Віталь Рымашэўскі.
— Я прадстаўляю Свабодны прафсаюз Беларускі, з'яўляюся ягоным сябрам. Учора было цалкам легальнае мерапрыемства — студэнты розных ВНУ сабраліся на ўстаноўчую сесію новай студэнцкай прафсаюзнай арганізацыі ЛіСА (Ліга студэнцкіх аб'яднанняў).
Паводле статуту, некалькі ячэек адной скіраванасці, у дадзеным выпадку студэнцкія ў розных ВНУ — БДУ, БДМУ, БДАІ, якія зарэгістраваныя ўнутры Свабоднага прафсаюза Беларускага, могуць ствараць галіновыя арганізацыі, — тлумачыць Віталь Рымашэўскі. — Учорашняе мерапрыемства было цалкам адкрытым, з запрашэннем СМІ, з інфармацыяй пра гэта ў сацыяльных сетках, з агучанай загадзя праграмай.
Суразмоўца кажа, што акрамя студэнтаў на мерапрыемстве было яшчэ некалькі запрошаных гасцей, якія павінны былі выступаць. Але з'явіліся невядомыя і ўсіх затрымалі.
— Нас развезлі па розных РУУС, дзе праводзілі апытанні на працягу 4-5 гадзін, — апісвае сітуацыю Віталь Рымашэўскі. — Выпускаць пачалі бліжэй да ночы, мяне амаль апоўначы. У нас забралі тэлефоны. Многім не давалі патэлефанаваць, сваякі былі не ў курсе, што іх затрымалі. Нам у Маскоўскім РУУС, праз гадзіны паўтары пасля затрымання, пасля доўгіх угавораў усё ж далі па адным разе патэлефанаваць. Са мной было яшчэ 6 чалавек. Адзін з іх непаўналетні. Нас не білі, у гэтым плане было ўсё даволі культурна. Мой тэлефон у выніку ўсіх гэтых пертурбацый згубілі. Я аднавіў сім-карту.
Віталь Рымашэўскі распавядае, што ў РУУС іх распытвалі наконт сходу. «Я думаю, што проста хацелі напалохаць студэнтаў, каб прафсаюз не развівалі», лічыць ён.
— Але гэта абсурд! Ёсць зарэгістраваны прафсаюз. Стварэнне студэнцкага прафсаюза як адной з формаў аб'яднанняў цалкам легальна ў рамках існых законаў, — здзіўляецца суразмоўца. — Улады кажуць, што хочуць прымірэння, што ўсе павінны дзейнічаць у межах закона. Кажуць, што людзі, якія выходзяць на вуліцы, парушаюць заканадаўства. Але ўчора быў прыклад таго, калі наогул нічога не было парушана, але людзей затрымалі.
Прыкладна такую ж карціну абмаляваў і адзін са студэнтаў БДУ Аляксандр Паршанкоў, які прысутнічаў на мерапрыемстве.
— Я старшыня студэнцкага прафсаюза БДУ. Мы прыйшлі на мерапрыемства Свабоднага прафсаюза Беларускага, у які ўваходзім. Гаварылі акурат пра стварэнне галіновай арганізацыі студэнцкіх прафсаюзаў. Прайшло хвілін 30, пачалося маскі-шоў: прыехалі супрацоўнікі, якія не прадставіліся, паставілі ўсіх да сцяны, сказалі апусціць тэлефоны. Пасля гэтага нас вывелі без верхняга адзення, пасадзілі ў мікрааўтобусы, потым далі каманду вярнуцца па рэчы — мы апрануліся. Затым нас развезлі па РУУС, — распавядае студэнт. — Я быў у Фрунзенскім, са мной яшчэ 6 чалавек з БДУ. Мы правялі там некалькі гадзін. Апошнія хлопцы выйшлі ў дзве гадзіны ночы.
Аляксандр кажа, што ў РУУС яму задавалі пытанні, якія тычацца мерапрыемства: навошта сабраліся, як усё адбывалася.
— Сказалі, што наша арганізацыя незаконная. Пратаколы на нас не складалі. Было сказана, што гэта гутарка. Мне сказалі заявіць на відэа, што наш прафсаюз распушчаны ў сувязі з тым, што ён не мае рэгістрацыі ў Мінгарвыканкаме. Аднак не ўлічаны адзін момант. Я, вядома, старшыня прафсаюза, але гэта не значыць, што я магу яго распусціць, — адзначае Аляксандр. — Ёсць Свабодны прафсаюз Беларускі. Гэта адзін з чатырох незалежных прафсаюзаў у краіне. Мы ўсе ў яго ўваходзім. Грамадзяне — супрацоўнікі якіх-небудзь устаноў могуць ствараць першасныя арганізацыі гэтага прафсаюза ў сябе па месцы працы або вучобы. Гэта значыць, праходзіць падвойная рэгістрацыя. Спачатку ячэйка рэгіструецца ў радзе СПБ, і яна ў нас ёсць. А потым падаюць дакументы на рэгістрацыю ў Мінгарвыканкам. І гэтай рэгістрацыі ў нас пакуль няма. Мы падавалі ўжо адзін раз заяву. Зараз на разглядзе знаходзіцца другая. Але прэтэнзіі да нас, што мы не зарэгістраваныя. Але мы дзейнічаем у БДУ не як незалежная структура, а як першасная арганізацыя зарэгістраванага незалежнага прафсаюза. Ніякай незаконнай арганізацыі няма. Проста такая назва, але па сутнасці гэта частка Свабоднага прафсаюза Беларускага.
Як кажа Аляксандр, сілавікі не адпусцілі пецярых. «Мяркуючы па ўсім, яны на Акрэсціна, таму што ўчора ў РУУС так сказалі бацькам тых, каго не выпусцілі», — кажа ён. Усяго ж затрымалі каля 30 студэнтаў.
Атрымаць аператыўна інфармацыю ад МУС не ўдалося.
