У лісце Чайчыц дае парады, як трэба ставіцца да тых адвакатаў, хто выказвае прынцыповую пазіцыю аб сітуацыі з правам у краіне.
Віктар Чайчыц на Круглым стале Юрыя Васкрасенскага, фота Надзеі Бужан
«Адвакатам пры публічных выступленнях варта выкарыстоўваць толькі дакладную інфармацыю, пазбягаючы крытыкі ў дачыненні грамадзян і арганізацый, не заснаванай на заканадаўстве, афіцыйных статыстычных дадзеных і рашэннях судоў», — раіць Чайчыц.
«У выступленнях на справаздачных канферэнцыях адвакатаў звярталася ўвага на тое, што асобныя адвакаты ў сваіх публікацыях перашлі мяжу дазволенага, а астатнія адвакаты ў большасці на гэта не рэагуюць», — абураецца ён тымі, якія жывуць, у яго разуменні, па прынцыпе «мая хата з краю».
«Адвакаты крайне інэртныя, ніхто не спыняе тых, хто займаецца ўласным піярам ў шкоду не толькі свайму кліенту, але і адвакатуры агулам. Гэта дае нагоду дзяржаўным органам лічыць, што так, як падаюць інфармацыю асобныя адвакаты, лічаць усе ці падаўляльная большасць. Магчыма, менавіта гэты факт і з’явіўся нагодай для ўзмацнення ўплыву з боку дзяржавы на адвакацкую дзейнасць», — гаворыцца таксама ў лісце.
Напрыканцы даюцца рэкамендацыі як дзейнічаць.
«Радам тэрытарыяльных калегій адвакатаў актывізаваць работу па падрыхтоўцы публікацый аб станоўчым іміджы адваката, важнасці выканання Правіл прафесійнай этыкі, а таксама аб тым, як няправільныя паводзіны аднаго адваката ўплываюць на аўтарытэт усяго інстытута», — піша Чайчыц, выстаўляючы дэдлайны для публікацый кожнай калегіі.
Тым часам прынцыповыя адвакаты, якія адстойваюць прынцыпы права і законнасці, абараняюць затрыманых і асуджаных па палітычных прычынах, метадычна пазбаўляюцца ліцэнзій.
