Сілавікі не далі сабрацца людзям у Мінску на акцыю пратэсту. Людзей на вуліцах і ў дварах затрымлівалі прэвентыўна.
У Мінску ў раёне месца збору дэманстрантаў сістэмна затрымлівалі таксама рэпарцёраў недзяржаўных выданняў. Сярод затрыманых — рэдактары і фотарэпарцёры «Нашай Нівы» i Tut.by.
Масавыя затрыманні адбыліся сёння таксама ў Навагрудку, а ператрусы — у Салігорску, дзе яны закранулі стачкамаўцаў «Беларуськалія», а таксама ў мастака Алеся Пушкіна ў Бабры Крупскага раёна.
З іншых падзей дня: сын Уладзіміра Макея, былы дыпламат, раскрытыкаваў учарашнюю заяву МЗС на адрас ЗША: «Мне сумна, што мае былыя калегі, да многіх з якіх я адчуваю шчырыя сяброўскія пачуцці, вымушаныя мірыцца з сітуацыяй, пры якой немагчыма свабодная стваральная творчасць. Вельмі хацелася б, каб у гэты задушлівы час прафесіяналы захавалі свае веды, навыкі, вопыт і маральныя арыенціры. Яны нам усім яшчэ спатрэбяцца», — напісаў ен у LinkedIn.
Вось храналогія падзей дня.
19:30
Адпушчаныя з РУУС рэдактары Tut.by Ганна Калтыгіна і Галіна Уласік.
19:20
Наша журналістка Кацярына Карпіцкая на волі. Фатограф Надзея Бужан таксама. Пасля 21:20 адпусцілі і Ягора Марціновіча. Але з двума пратаколамі: непадпарадкаванне і ўдзел у незаконным масавым мерапрыемстве.
17:10
Паводле міліцыі, сёння былі затрыманыя больш за 100 чалавек.
16:15
На вуліцы Багдановіча сігналяць машыны.
15:45
15:40
У сённяшнім праўладным аўтапрабегу ў раёне плошчы Бангалор бралі ўдзел машыны са сцягамі «ДНР».
15:33
У МУС заявілі, што «ва ўсіх рэгіёнах краіны не зафіксавана ніводнага несанкцыянаванага масавага мерапрыемства».
«Малалікія групы з незарэгістраванай сімволікай заўважаныя ў Мінску, некаторыя пратэстоўцы дастаўленыя ў тэрытарыяльныя органы ўнутраных спраў для разбору», — гаворыцца ў паведамленні ведамства.
15:31
У раёне плошчы Бангалор затрыманая журналістка «НН» Кацярына Карпіцкая.
15:21
У раёне плошчы Бангалор затрымалі галоўнага рэдактара «Нашай Нівы» Ягора Марціновіча і фатографку Надзею Бужан. Іх машыну спынілі даішнікі. Ягора спачатку павялі на размову, а пасля амапавец суправадзіў яго ў аўтазак. Апошняе, што напісала Надзея: «Прынялі».
15:10
Да плошчы Бангалор прыехалі аўто з чырвона-зялёнымі сцягамі.
14:52
Вялікая колькасць людзей прагульваецца і па вуліцы Багдановіча з боку Бангалор. Тут таксама прысутнічае і дзяржаўная прэса.
14:51
14:45
Паўсюдна ў ваколіцах Бангалора прагульваюцца сотні чалавек. Усе без сімволікі. Калі хтосьці з кіроўцаў пачынае сігналіць, людзі паказваюць знак салідарнасці. Народу шмат, але паколькі спецтэхнікі нямерана, то ўсе стараюцца не прыцягваць да сябе ўвагу.
14:35
Затрыманая рэдактар партала Tut.by Ганна Калтыгіна.
Затрыманая таксама рэдактар Tut.by Галіна Уласік. Яна знаходзілася ў раёне плошчы Бангалор у адной з устаноў грамадскага харчавання.
14:32
14:25
Мінчукі абураюцца, што сілавікі схапілі хлопца, які проста стаяў на прыпынку.
14:20
На плошчы Бангалор таксама пачаліся першыя затрыманні. Усе чатыры падыходы туды перакрытыя.
Ля Бангалора амапаўцы выбарачна падыходзяць да людзей, пытаюцца, чаму яны тут ходзяць, правяраюць сумкі і просяць паказаць тэлефоны.
14:10
Шмат сілавікоў і на «Пушкінскай». Некалькі чалавек затрыманыя.
Паведамляецца пра затрыманні ў раёне станцыі метро «Акадэмія навук».
Уздоўж праспекта Незалежнасці ад цырка ў бок Палаца Рэспублікі дзяжураць сілавікі.
