Колькасць інфікаваных каранавірусам «занадта вялікая», а загружанасць аддзяленняў інтэнсіўнай тэрапіі зноў расце, сказала канцлер Нямеччыны Ангела Меркель.

«Трэба сказаць, што трэцяя хваля стала самай цяжкай для нас», — адзначыла яна на адкрыцці Міжнароднай прамысловай выставы ў Гановеры (цытата па Die Welt).

Са слоў Меркель «самай важнай зброяй у барацьбе з пандэміяй» застаецца вакцынацыя, у той час як тэставанне на COVID-19 дапамагае ўладам «пабудаваць мост» насустрач нармалізацыі.

Колькасць інфікаваных каранавірусам у Германіі пачала расці ў пачатку сакавіка. Калі ў пачатку таго месяца ў ФРГ за суткі выяўлялі ад 5 тыс. да 11,3 тыс. інфікаваных, дык да 7 красавіка паказчык вырас да 30,3 тыс. чалавек, вынікае са звестак Універсітэта Джонса Хопкінса. Усяго ад пачатку пандэміі ў Германіі зарэгістравалі больш за 3 млн інфікаваных каранавірусам, памерлі ад захворвання 78,5 тыс. чалавек.

Еўракамісія абвясціла аб пачатку трэцяй хвалі каранавіруса ў Еўропе 19 сакавіка. Тады міністр аховы здароўя Германіі адзначаў, што «ў Еўропе яшчэ недастаткова вакцыны, каб спыніць» новы рост інфекцыі.

Усяго ў Еўропе ўхвалена выкарыстанне чатырох вакцын супраць каранавіруса — гэта прэпараты ад амерыканскіх кампаній Pfizer, Moderna і Johnson & Johnson, а таксама брытанска-шведскай AstraZeneca.

Улады ЕС планавалі пачаць масавую вакцынацыю, якая, як меркавалася, дазволіла б паступова вярнуцца да нармальнага жыцця, з пачатку гэтага года. Аднак паўнавартаснай рэалізацыі прышчэпачнай кампаніі перашкодзіў недахоп вакцыны — з розных прычын фармкампаніі не змаглі паставіць патрэбную колькасць доз.

Хочаш падзяліцца важнай інфармацыяй ананімна і канфідэнцыйна?