З таварыства ўласнікаў аднаго са шматпавярховых дамоў Брэста праз суд спагналі 889 рублёў за бел-чырвона-белае падсвятленне пажарных лоджый, паведамляе Tut.by са спасылкай на Генпракуратуру.
У шматкватэрным доме на вуліцы Луцкай са жніўня па лістапад мінулага года на пажарных лоджыях мянялі лямпачкі. Пракуратура паведамляе, што гэтым парушаліся патрабаванні будаўнічых нормаў.
Адміністрацыя Маскоўскага раёна Брэста неаднаразова накіроўвала старшыні таварыства ўласнікаў прадпісанні з патрабаваннем вярнуць усё, як было. Аднак гэта ігнаравалася — суд аштрафаваў старшыню.
Пазней пракуратура горада звярнулася ў суд з пазовам аб спагнанні 164 рублёў на карысць камунальнікаў. У такую суму ЖРЭУ ацаніла панесеныя выдаткі па абследаванні сістэмы асвятлення і замене лямпачак.
Суд задаволіў пазоў. Акрамя грошай для камунальнікаў, з таварыства ўласнікаў спагналі яшчэ 725 рублёў дзяржпошліны.
Каментары