Міліцыя затрымала пенсіянерку каля магілы Быкава, але суддзя адправіла справу на дапрацоўку
14 мая суддзя Першамайскага раёна Анастасія Ляйкоўская разглядзела справу 61-гадовай Ірыны Карнеевай. Згодна з пратаколам, Ірына Ігараўна «ўзяла актыўны ўдзел у пікетаванні, усталяваўшы БЧБ-сцяг на надмагіллі Васіля Быкава». Спадарыню Ірыну затрымалі проста на могілках, а ў Першамайскім РУУСе на яе склалі пратакол па ч. 3 арт. 24.23 КаАП.
На судзе Ірына патлумачыла, што добра памятае дзень пахавання Быкава, калі яго труну накрылі БЧБ-сцягам. Таму яна вырашыла завязаць кветкі стужкамі менавіта гэтай расфарбоўкі. Да магілы пісьменніка жанчына 9 траўня ўсклала тры чырвоныя цюльпаны, паведамляюць праваабаронцы.
Па словах Ірыны, сцяг яна не ўсталёўвала, а толькі ўсклала кветкі. Яна лічыць гэта выразам сваёй павагі, а не пікетаваннем. Пенсіянерка знаходзілася каля надмагілля толькі 5 хвілін. У гэты момант да Карнеевай падышлі два супрацоўнікі міліцыі і адвялі ў службовую машыну. Па дарозе ў яе пыталіся, ці ведае яна пра акцыю, на што Ірына адказала адмоўна.
У суд асабіста прыйшоў і сведка-міліцыянт, які пацвердзіў, што Ірына ўсталявала сцяг і распавядаў суду пра заклікі ў дэструктыўных тг-каналах. Таксама пры затрыманні сведка прапанаваў жанчыне забраць кветкі для доказу яе віны, але ў пратаколе напісалі толькі пра БЧБ-сцяг.
Ірына каля надмагілля Быкава пазнаёмілася з мужчынам, які асабіста ведаў пісьменніка. У момант іх гутаркі і адбылося затрыманне, таму жанчына папрасіла знаёмага прыйсці ў суд у якасці сведкі. На судзе ён пацвердзіў, што ніякай сімволікі Карнеева не ўскладала.
Пенсіянерка паспрабавала звярнуцца да сведкі-міліцыянта:
— Я хацела б даведацца, што адчувае чалавек, які хлусіць суду?
— Пытанне здымаецца.
Сведка-міліцыянт суду пацвердзіў, што затрымліваў жанчыну каля 19-й гадзіны, але ў пратаколе гаворка ідзе пра 16 гадзін. У Ірыны атрымалася даказаць, што ў 16:00 яна знаходзілася ў іншым месцы, дзякуючы чэку.
Адвакат жанчыны звярнуў увагу суда на характэрныя памылкі ў пратаколе і дадаў, што пытанні аб кветках і стужках ніяк не адносяцца да справы, бо Ірыну абвінавачваюць канкрэтна ў устанаўленні сцяга. Пасля тлумачэнняў адваката суддзя Ляйкоўская вырашыла вярнуць справу на дапрацоўку.
Каментары