Кардыёлага Вольгу Карнееву пакаралі штрафам 5800 рублёў за кветкі каля мемарыяла Тарайкоўскага
Такое рашэнне вынесла сёння суддзя Марыя Ярохіна.
56-гадовая доктарка-кардыёлаг Вольга Карнеева 16 мая каля 16.20 усклала кветкі да народнага мемарыяла Аляксандра Тарайкоўскага. У гэты момант да яе адразу пад'ехаў бус, адкуль выйшлі каля сямі супрацоўнікаў АМАПа, адзін з якіх здымаў усё на відэа. Яе затрымлівалі адразу чацвёра супрацоўнікаў, нагадвае spring96.org.
Вольгу даставілі ў Фрунзенскае РУУС і склалі пратакол за несанкцыянаванае пікетаванне па арт. 24.23 КаАП. 17 мая справу доктара разглядзела суддзя Фрунзенскага раёна Марыя Ярохіна.
Сваю віну Карнеева не прызнала. Жанчына патлумачыла, што праходзіла міма мемарыяла і ўбачыла, што на месцы гібелі мала кветак, таму спусцілася ў пераход і купіла букет. Вольга распавяла, што гэта старажытная славянская духоўная традыцыя — класці кветкі на месца гібелі чалавека. Таму яна проста паклала іх і пайшла далей.
Суддзя Ярохіна ўдакладніла, ці знаходзіцца на станцыі метро «Пушкінская» якое-небудзь пахаванне. Карнеева нагадала суду, што на тым месцы загінуў чалавек.
Пасля чаго адбыўся наступны дыялог Вольгі з суддзёй Ярохінай:
— Ці з'яўляецца блізкім сваяком асоба, пра якую Вы кажаце, якая загінула, пры абставінах, пра якія суду не вядома, Вы нам не патлумачыце?
— Суд ведае гэтыя абставіны і без мяне. Ён мне не з'яўляецца блізкім сваяком. Ён проста чалавек. Проста грамадзянін Рэспублікі Беларусь.
— Раскажыце, пра каго Вы кажаце.
— Пра Аляксандра Тарайкоўскага.
— Якое Вы маеце дачыненне да гібелі гэтага грамадзяніна?
— Ніякага.
— Можаце патлумачыць суду сваё волевыяўленне?
— Мне проста па-чалавечы шкада. У мяне гуманітарная прафесія — я доктар. Мне не падабаецца, калі гінуць людзі. Я шаную памяць загінулых, таму і паклала туды кветкі.
Вольга Карнеева заявіла, што сведка-міліцыянт, які прыйшоў у суд, не прымаў удзел у яе затрыманні, бо затрымлівалі яе супрацоўнікі АМАПа. Па яго словах, акрамя ўскладання кветак, Вольга яшчэ і ўздымала руку ўверх каля дарогі, каб прыцягнуць увагу кіроўцаў.
Суддзя Марыя Ярохіна вырашыла зрабіць у справе Карнеевай перапынак да 18 мая, а сёння пакарала штрафам 200 базавых (5800 рублёў).
Цяпер чытаюць
Кіраўніка маркетынгавай кампаніі прысудзілі да 7,5 года за сацыялагічнае даследаванне пра кавід у Беларусі — «здрада дзяржаве»4
Кіраўніка маркетынгавай кампаніі прысудзілі да 7,5 года за сацыялагічнае даследаванне пра кавід у Беларусі — «здрада дзяржаве»
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3434
Каментары