Днямі газэта «Вечерний Минск» паведаміла, што неўзабаве тралейбусы зьнікнуць з былога праспэкту Машэрава – ад вуліцы Сапёраў (каля «БелЭкспа») да ГУМа. Рашэньне пра гэта 6 ліпеня прыняў Менгарвыканкам. На гэты раз зьняцьцё тралейбусаў тлумачыцца клопатам пра гістарычны цэнтар Менску. Сёньня на згаданым участку ходзяць тры тралейбусныя маршруты ў тры спальныя раёны – Вясьнянку, Масюкоўшўчыну і Паўднёвы Захад.
Нагадаем, што 21 чэрвеня былі скасаваныя тралейбусныя маршруты на праспэкце Скарыны ад плошчы Якуба Коласа да Маскоўскага аўтавакзалу. Замест 5-ці зьмененых або скарочаных тралейбусных маршрутаў (№№1, 2, 37, 54, 55) быў прадоўжаны аўтобусны маршрут №100. Прычынай скасаваньня была названая «аптымізацыя транспартнага абслугоўваньня». Рэакцыя менчукоў на гэтае рашэньне, мяркуючы па інтэрнэт-актыўнасьці, была нэгатыўнай.
Пачаткам зьнікненьня тралейбусаў з гарадзкіх вуліц было скасаваньне руху па праспэкце Скарыны ад плошчы Незалежнасьці да плошчы Якуба Коласа 10 верасьня 2002 году. Сярод прычынаў называліся зношанасьць тралейбусных апораў, непаваротлівасьць тралейбусаў, неэстэтычны выгляд кантактных сетак і… пляны па хуткім пераўтварэньні праспэкта Скарыны ў пешаходную зону. Усе тралейбусныя маршруты былі замененыя адным аўтобусным – №100. У выніку былі разарваныя транспартныя сувязі праспэкту з вуліцай Куйбышава і Камароўскім рынкам (былы т.м. №43), вуліцай Маякоўскага і Чэрвеньскім рынкам (былы т.м. № 5).
