Новаўвядзенні ў Працоўным кодэксе: звальненне за пападанне на суткі, забарона палітычных забастовак
Міністэрства працы і сацыяльнай абароны пракаментавала змены ў Працоўны кодэкс і закон «Аб прамысловай бяспецы», якія ўнесены прынятым 28 мая 2021 года законам №114-З «Аб змяненні законаў па пытаннях працоўных адносін», піша БелТА.
Так, у частцы пытанняў дысцыплінарнай адказнасці пункт 7 артыкула 42 Працоўнага кодэкса дапаўняецца новымі падставамі звальнення з ініцыятывы наймальніка. Гэта адсутнасць на працы ў сувязі з адбываннем адміністрацыйнага спагнання ў выглядзе адміністрацыйнага арышту, што перашкаджае выкананню працоўных абавязкаў.
Дастатковай падставай таксама можа стаць прымус работнікаў да ўдзелу ў страйку, стварэнне іншым работнікам перашкод для выканання іх працоўных абавязкаў, заклік работнікаў да спынення выканання працоўных абавязкаў без уважлівых прычын; удзел работніка ў незаконнай забастоўцы.
Законам унесены змены ў артыкул 46 ПК, згодна з якім выключаюцца неабходнасць папярэдняга паведамлення прафсаюза пры скасаванні працоўнага дагавора з работнікам па вышэйназваных трох новых падставах звальнення, а таксама магчымасць уключэння ў калектыўныя дагаворы, пагадненні патрабавання аб папярэдняй згодзе прафсаюза на звальненне на гэтых падставах.
Вызначаюцца дысцыплінарная адказнасць за супрацьпраўныя дзеянні з персанальнымі данымі. Артыкул 47 ПК дапоўнены новай падставай звальнення за парушэнне работнікам парадку збору, сістэматызацыі, захоўвання, змены, выкарыстання, абязлічвання, блакавання, распаўсюджвання, прадастаўлення, выдалення персанальных даных.
Карэкціроўкай артыкула 49 ПК пашыраныя паўнамоцтвы наймальніка для адхілення работніка ад працы. У прыватнасці, у выпадках, калі той заклікае іншых работнікаў да спынення працы без уважлівых прычын.
Разам з уключэннем у ПК новых падстаў звальнення, законам удакладняецца парадак прыцягнення работнікаў да дысцыплінарнай адказнасці. Змены ў артыкул 199 кодэкса прадастаўляюць наймальніку права прымяняць да работніка дысцыплінарнае спагнанне ў тым ліку і ў тых выпадках, калі немагчыма атрыманне ад работніка тлумачэння з нагоды здзейсненай дысцыплінарнай правіны. Адсутнасць такой магчымасці павінна быць аформлена актам з указаннем прысутных сведак.
Артыкул 388 ПК дапаўняецца нормай, згодна з якой пры правядзенні забастовак забараняецца выстаўленне палітычных патрабаванняў. З улікам карэкціроўкі артыкула 395 ПК рашэнне суда аб прызнанні незаконнымі забастоўкі або рашэння аб яе правядзенні будзе падлягаць неадкладнаму выкананню.
Вызначана, што спецыяльным законам могуць быць устаноўлены абмежаванні рэалізацыі права на страйк у той меры, у якой гэта неабходна ў інтарэсах нацыянальнай бяспекі, грамадскага парадку, здароўя насельніцтва, правоў і свабод іншых асоб.
Законам устаноўленая забарона на правядзенне забастовак на прадпрыемствах, якія маюць небяспечныя вытворчыя аб'екты.
Змены ўступяць у сілу 30 чэрвеня 2021 года.
Цяпер чытаюць
Беларускім топ-чыноўнікам у Валгаградзе раздалі каларадскія стужкі. Марзалюк застаўся з яблыневай ФОТЫ6
Каментары