Мэр Кіева Віталь Клічко ў інтэрв'ю Радіо Свобода патлумачыў, чаму горад закупляе беларускія транспартныя сродкі і амаль не закупляе ўкраінскіх, напрыклад, ад львоўскага прадпрыемства «Електрон».
Адносна аўтобусаў вытворчасці мінскага завода МАЗ Клічко сказаў, што закупкі беларускай тэхнікі пачаліся ўжо даўно, задоўга да цяперашняга палітычнага абвастрэння ў Беларусі.
«Яны ўжо закупленыя, і шмат гадоў мы іх закуплялі. Мінскія аўтобусы па якасці… Яны «мінскія», ведаеце, як? Рухавік — «Мерседэс», каробка — французскае «Пежо», гэта значыць усе складнікі еўрапейскія, адпавядаюць усім нормам, сучасныя. І на тэндарах найлепшую цану і якасць яны дэманструюць», — сказаў ён.
«Цяпер палітычная сітуацыя ў Беларусі змянілася. Але гэтыя закупкі былі да гэтага палітычнага абвастрэння», — распавёў Клічко.
«Я разумею, што мы павінны падтрымліваць айчыннага вытворцу, але ў нас патрабаванні да айчыннага вытворцы: калі ласка, якасць! Гэта вельмі важна. Мы можам купіць, але калі яны не будуць ездзіць, а будуць рамантавацца, нават новыя, то гэта не вельмі добра», — падкрэсліў мэр украінскай сталіцы.
Аўтобусы МАЗ даўно закуплялі ў вялікіх колькасцях, у тым ліку і праз тэндары, розныя гарады Украіны — не толькі Кіеў. Гэта выклікала шквал крытыкі з боку ўкраінскага грамадства, асабліва на фоне палітычнага крызісу, з якім сутыкнулася Беларусь. Мэр Львова Андрэй Садавы распавёў пра тое, што горад прынцыпова не будзе купляць беларускія аўтобусы, нягледзячы на іх перамогу ў тэндарах.
Цяпер чытаюць
У пачатку вайны кавэзэшніцу Марыну Грыцук вывозілі з-пад Кіева на танку. Цяпер яна вядзе мерапрыемствы ў Расіі5
Каментары