Патрык Пат Жан-Батыст з партнёркай па сцэне
Ottawan — французскі дыска-гурт, што быў папулярны ў пачатку 1980-х.
Гурт з’явіўся ў 1979-м. Яго галоўная зорка — Патрык Пат Жан-Батыст, які нарадзіўся ў Гвадэлупе.
Пат працаваў у кампаніі Air France, а ў вольны час спяваў у барах, дзе яго заўважыў прадзюсар.
Разам з ім у гурце працавала спявачка і танцоўшчыца Анэт Эльтыс.
За першыя гады гурт выпусціў некалькі гучных песеснь, якія трапілі ў хіт-парады, напрыклад: «D.I.S.C.O.», «You’re OK» і «Hands Up (Give Me Your Heart)».
Частка песняў выпускалася адначасова па-французску і па-англійску. У апошнім выпадку даводзілася спяваць пад фанаграму.
У 1982-м гурт распаўся. Патрык і Анэт сышлі ад прадзюсаў і стварылі гурт Pam'n'Pat, але ён не меў такой папулярнасці.
У 1984-м прадзюсары запрасілі ў гурт спевакоў Esther і Robert, якія выступаюць пад брэндам «Ottawan» і спяваюць яго песні.
Пат таксама імкнецца выкарыстоўваць брэнд, хоць прадзюсары падкрэсліваюць, што ён не мае на тое права і парушае закон.
У сваю чаргу на альтэрнатыўным сайце гурта ўскосна пацвярджаецца факт забароны. Але сцвярджаецца, што прадзюсары ўжо не цікавяцца жыццём гурта. І правы на Ottawan маюць не толькі яны, але і заснавальнікі.
Пат змяніў ужо некалькі партнёрак. Пэўны час у гурце нават спявала яго стрыечная сястра. Некалькі разоў на сцэну выходзіла і дачка.
Жан-Батыст актыўна працуе на постсавецкай прасторы, на яго сайце ёсць нават рускамоўная версія. Таму, хутчэй за ўсё, менавіта яго версія гурта будзе выступаць у Віцебску.
«Наша Ніва» напісала абодвум калектывам, ды так і не атрымала адказу.
Зрэшты, абодва Ottawan пераважна спяваюць хіты, напісаныя за два гады працы.
