Што такое «Атрады грамадзянскай самаабароны», якіх Лукашэнка абвінаваціў у тэрарызме?
За датычнасць да «АГСБ» (Атрадаў грамадзянскай самаабароны Беларусі) затрыманыя ўжо дзясяткі беларусаў, некаторых ужо судзяць. У СІЗА знаходзіцца і грамадзянін Расіі Ягор Дуднікаў, які агучваў аўдыяпаведамленні і відэаролікі ў канале і чаце. Лукашэнка назваў мінулатыднёвыя арышты «антытэрарыстычнай аперацыяй».
Затрыманыя па «справе чатаў» беларусы. Сярод іншага, іх абвінавачваюць у жаданні падпаліць «Табакерку»
Дык што такое «АГСБ» — канал, які беларускія ўлады прызналі экстрэмісцкім. Гэта канал, створаны расіянінам Дзянісам Хромавым. Сам ён жыве ў Германіі. Вядомы тым, што ў 2010-х чытаў battle-рэп пад псеўданімам D1S.
Ніякага дачынення да Беларусі Хромаў не мае, але падчас пратэстаў у Мінску Дзяніс вырашыў, што беларусы дзейнічаюць няправільна, і з назіральніка ператварыўся ва ўскоснага ўдзельніка — стварыў радыкальны канал і чат.
Дзяніс Хромаў (Хофман)
Правакатыўны стыль канала быў відавочны: так, адміністратары скідалі фота паляўнічай зброі на фоне нацыянальнага бел-чырвона-белага сцяга з падводкай у духу «У вас ёсць зброя, якую вы гатовыя ўжыць супраць карнікаў? Скідайце фота ў наш бот! А таксама фота любых іншых прылад, якія могуць нанесці шкоду здароўю».
Абсалютна ясна, што гэта чыстая правакацыя. Нават калі б такі ахвотнік знайшоўся, то яго б хутка вылічылі, бо ўсе ўчастковыя ведаюць, як выглядаюць ружжы на іх тэрыторыі — дастаткова зрабіць рассылку з загадам апазнаць. Але такая лоўля на жыўца працягвалася даволі доўга.
Адміністратары і мадэратары канала, сярод якіх, як у наступным выявілася, былі супрацоўнікі органаў, заахвочвалі ўдзельнікаў да актыўных дзеянняў.
Як выглядае, некаторыя беларусы, расчараваныя ў немагчымасці спыніць беззаконне мірным шляхам, ішлі раіцца аб далейшых дзеяннях да Хромава і яго ананімных паплечнікаў, якія падказвалі, што трэба рабіць.
Вынік відавочны: на паказаных кадрах «нападзення на Азаронка» Дзмітрый Сасноўскі выходзіць з машыны разам з «паплечнікам», узброеным пісталетам. Але ні твар паплечніка, ні яго імя не называюцца, хаця ён і выглядае галоўным у працэсе. Можна толькі здагадвацца, дзе працуе гэты «саўдзельнік».
Чытайце таксама: Лукашэнка заявіў, што ноччу была спроба забойства Азаронка
Дзмітрыя Сасноўскага арыштавалі за тое, што апынуўся побач з Азаронкам падчас «нападу».
У дні, калі Лукашэнка анансаваў «антытэрарыстычную аперацыю», у чаце канала змянілася аватарка і пачалося выдаленне падпісантаў. Маўляў, чат захоплены органамі. Потым адміністратары патлумачылі — «адзін з мадэратараў аказаўся пацуком».
Наталля Мацвеева (нік Актавія) цяпер за кратамі, бо разам з «паплечнікам» вырашыла зладзіць дыверсію на лясгасе. Аказалася, што паплечнік і быў тым самым мадэратарам-пацуком.
Апроч таго, у канале і ў чаце паслядоўна крытыкаваліся і дыскрэдытаваліся асноўныя фігуры дэмакратычнага руху — Святлана Ціханоўская і яе каманда. Нейкі час, — магчыма, і ад самага старту, — работнікі органаў з'яўляліся мадэратарамі гэтага чата, дасягаючы сваіх мэтаў. У выніку самыя актыўныя ўдзельнікі «АГСБ» цяпер трапілі за краты.
Цяпер чытаюць
«Аднавілі грамадскі парадак, не саступіўшы патрабаванням новых выбараў». Што піша Грокіпедыя пра пратэсты, Лукашэнку, мову і як дзеліць спадчыну ВКЛ1111
Каментары