Хто такі Аляксей Глотаў, якога АМАП затрымаў нібыта за планы ўзарваць расійскі вузел сувязі пад Вілейкай?
Нядаўна Аляксандр Лукашэнка паведаміў пра шэраг тэрактаў, якія прадухілілі беларускія сілавікі: маўляў, планавалася пакушэнне на Азаронка, дыверсія ў лясгасе і выбух на расійскім ваенным вузле сувязі пад Вілейкай. Дзяржаўныя СМІ пазней паказалі кадры затрымання некаторых людзей, усе яны нібыта з чатаў так званых «Атрадаў грамадзянскай самаабароны». «Наша Ніва» сабрала інфармацыю пра аднаго з затрыманых. Менавіта яго паказвалі як чалавека, што меў намер узарваць вузел сувязі.
Аляксею Глотаву 43 гады, ён жыве ў аграгарадку Камунар Буда-Кашалёўскага раёна (Гомельская вобласць).
Быў жанаты, у шлюбе нарадзілася двое хлопцаў, але з жонкай Аляксей даўно развёўся.
«Ён калісьці працаваў будаўніком на бройлернай птушкафабрыцы, пасля працаваў на сябе: вырабляў і збіраў корпусную мэблю», — расказваюць пра Глотава знаёмыя.
У аграгарадку пра затрыманне чулі, але без падрабязнасцяў: «Кажуць, нейкі тэракт у Мінску планаваў».
«Наша Ніва» звязалася з мамай Аляксея, але жанчына не захацела размаўляць. «Яго затрымалі, калі ехаў на працу. Больш нічога не ведаю», — сказала яна.
Затрыманне Глотава
Увогуле рэакцыя некаторых сваякоў на затрыманне Аляксея цікавая:
«Затрымалі — значыць, было за што», «Нармальных людзей не затрымліваюць, не парушайце закон», «Жывіце, працуйце і вас ніхто не кране». Некаторыя сябры ці сваякі проста праігнаравалі пытанні ці моўчкі заблакавалі акаўнт карэспандэнта «Нашай Нівы».
Мяркуючы па сацсетках, асноўнае хобі Глотава — рыбалка. Акрамя яе, ёсць здымкі з працы і шматлікія падпіскі на суполкі знаёмстваў.
Улетку 2020 года Глотаў рэпосціў паведамленні тэлеграм-каналаў, радаваўся рэгістрацыі Святланы Ціханоўскай кандыдатам у прэзідэнты. Апошнім часам у сацсетках палітычнага ці сацыяльнага парадку дня ўжо не было.
«Наша Ніва» адшукала і былую жонку Аляксея, але тая адмовілася ад размовы. «Нам няма пра што з вамі гаварыць, мы з ім разам даўно не жывем», — сказала яна.
Аляксея Глотава затрымалі 30 чэрвеня, пры сабе ён нібыта меў пісталет.
Цяпер чытаюць
«У майго 21 сантыметр — дзесяць базавых далі». Беларусы ў тыктоку жартуюць з новых правілаў ад чыноўнікаў2
Каментары