КДБ арыштаваў начальніка аддзела па барацьбе з карупцыяй і эканамічнымі злачынствамі Жлобінскага РАУС, гендырэктар Беларускага металургічнага завода пазбавіўся пасады.
Фота БелаПАН
Мікалай Андрыянаў. Фота БЕЛТА
16 красавіка гэтага года прэзідэнт Беларусі Аляксандр Лукашэнка заявіў, што не дапусціць у краіне «нахабнага парушэння закона» людзьмі, «надзеленымі ўладай і якую яны ўвасабляюць». Як прыклад беззаконня Аляксандр Лукашэнка прывёў гэтак званую паляўнічую справу ў Гомельскай вобласці, «дзе вялікія начальнікі міліцыі, кіраўнікі буйных прадпрыемстваў палявалі так, што сёння даводзіцца разбірацца ў межах крымінальнай справы».
Сутнасць крымінальнай справы прэзідэнт паведаміў праз два з паловай месяцы пасля першага згадвання. 29 чэрвеня на нарадзе з супрацоўнікамі МУС Лукашэнка заявіў: «У поле зроку КДБ нядаўна трапіў начальнік аддзела па барацьбе з карупцыяй і эканамічнымі злачынствамі Жлобінскага РАУС Мінянкоў, які арганізаваў умовы для заняткаў паляваннем, рыбалкай і яшчэ нечым».
Мінянкову ставіцца ў віну тое, што «ў 2003 годзе ён набыў і аформіў на падстаўную асобу сядзібу плошчай больш як 2 га на тэрыторыі Жлобінскага раёна і захапіў пры гэтым яшчэ больш як 1 га лясных угоддзяў, самавольна ўзвёў 14 пабудоў, завёў зграю з 29 пародзістых сабак і трыма дзікамі». «Усю гэтую гаспадарку абслугоўвалі мясцовыя жыхары», — пракаментаваў прэзідэнт. Паводле яго слоў, «на ўласнай базе рэгулярна вялося паляванне, рыбалка з удзелам кіраўнікоў, у тым ліку Беларускага металургічнага завода, і высокапастаўленых службовых асоб органаў унутраных спраў».
Карэспандэнты БелаПАН адправіліся ў Жлобінскі раён, каб убачыць «міліцэйскае бязмежжа» — угоддзі з два гектары, псярню, стайню.
На месцы аказалася, што пасля публічнага слоўнага разносу прэзідэнтам сілавікоў «разнеслі» і іх сядзібу.
Мясцовыя вартаўнікі сказалі, што з месяц таму тут стаялі вагончыкі і загончыкі, былі прыкладна чатыры кані і 30 сабак, за якімі яны даглядалі. «Але потым гаспадар чагосьці з КДБ заеўся — вось усё тут і развалілі», — сказаў вартаўнік. Потым неахвотна расказаў, што раней кожныя выхадныя сюды прыязджалі людзі паляваць і рыбачыць.
«Міністры яны, начальнікі ці хто — я іх у твар не ведаю. І з сем’ямі прыязджалі, і з дзецьмі. І яшчэ з кім — гэта не мая справа»,— сказаў вартаўнік Васіль.
Пра былы размах нагадваюць горы дошак, фундаменты «вагончыкаў», адрэзаныя электрапровады, разбураныя будынкі.
У Навамаркавіцкім сельсавеце патлумачылі, што сам «паляўнічы домік» належыць прыватнай асобе, прадпрымальніку са Жлобіна. Гэты дом быў пабудаваны лесніком, яму ж і належаў, але пасля смерці лесніка прадпрымальнік купіў домаўладанне. У сельсавеце ўдакладнілі, што дом знаходзіцца на тэрыторыі сельсавета, а пабудовы, узведзеныя ў лясным масіве, — на тэрыторыі лясніцтва.
Ва УКДБ па Гомельскай вобласці, куды карэспандэнт звярнулася з пытаннямі (у дачыненні да каго, па якіх артыкулах Крымінальнага кодэкса распачата справа аб незаконным паляванні або незаконных пабудовах у Жлобінскім раёне), ад каментарыяў адмовіліся.
Паводле звестак БелаПАН, начальнік аддзела па барацьбе з карупцыяй і эканамічнымі злачынствамі АУС Жлобінскага раёна Леанід Мінянкоў знаходзіцца ў следчым ізалятары КДБ, у дачыненні да яго распачата крымінальная справа за перавышэнне ўлады або службовых паўнамоцтваў, яму прад’яўлена абвінавачанне, вядзецца следства.
У адміністрацыі Беларускага металургічнага завода лаканічна адказваюць, што генеральны дырэктар завода Мікалай Андрыянаў тут ужо не працуе, і дзе ён — невядома.