У Беларусі немагчымае існаванне дыктатуры, сцвярджае Аляксандр Лукашэнка. «Калі б у нас была дыктатура, нас бы даўно раздавілі», — заявіў ён у інтэрв'ю аўстрыйскай газеце Die Presse.
Інтэрв'ю было дадзена 6 ліпеня. Сёння яго ўрыўкі публікуе дзяржаўнае агенцтва БелаТА са спасылкай на прэс-службу прэзідэнта.
«У нас няма ядзернай зброі, энерганосьбітаў і гэтак далей, — сказаў Лукашэнка. — Мы ж залежныя ад свету па ўсіх артыкулах. Мы не можам тут праводзіць тую палітыку, якая сёння сусветнай супольнасцю не ўспрымаецца, у тым ліку і Аўстрыяй.
Дыктатары сябе так, як я, не паводзяць.
Але трэба было «бірку» на прэзідэнта Беларусі павесіць, бо Лукашэнка — не амерыканскі, не праамерыканскі».
Кіраўнік дзяржавы прызнаў: «Тое, што ў прэзідэнта засяроджана пэўная ўлада, і немалая, — гэта праўда». «Але вазьміце больш сур`ёзныя рэчы, — дадаў ён. — Узялі і разбамбілі Ірак. З-за чаго? Што там, дыктатар, які стварае ядзерную зброю. Дыктатара няма. А ядзерная зброя дзе? Таксама няма. Дзіўна неяк атрымліваецца… «Бірку» вешаюць і пачынаюць пад гэта церабіць чалавека, краіну».
Лукашэнка аспрэчыў чуткі аб тым, што ён нібы рыхтуе малодшага сына ў якасці свайго пераемніка.
«У нас гэта немагчыма. І калі я гаварыў пра свайго малыша, то гэта быў звычайны жарт. Але журналісты гэта ўспрынялі чамусьці сур`ёзна», — сказаў ён.
Праз 10 гадоў прэзідэнт бачыць Беларусь «квітнеючай дзяржавай, да якой ніхто не будзе мець ніякіх прэтэнзій, у тым ліку і Аўстрыя». На пытанне, ці будзе тады Аляксандр Лукашэнка прэзідэнтам Беларусі, ён адказаў: «Наўрад ці. Я думаю, да гэтага часу вырастуць новыя людзі, якія возьмуць у рукі краіну і павядуць яе».
«Але запомніце, — падкрэсліў Лукашэнка. — У нашай краіне хто будзе прэзідэнтам чарговым, будзе вызначаць толькі беларускі народ.
Я памятаю, як мяне абіралі — так тады вырашыў народ. І гэта святое права ніхто не можа ў яго, у гэтага народа, адабраць. І я гэта права ў свайго народа адбіраць не збіраюся».
