Мінская фірма прадае кукурузныя палачкі з укладзенымі ў пакунак зусім недзіцячымі цацкамі. Некаторыя з іх забароненыя для продажу Мінскім гарадскім цэнтрам гігіены і эпідэміялогіі.
Фота Генадзя Казлоўскага.
Газета «Вечерний Брест» надрукавала гісторыю пра тое, як бабуля вырашыла пацешыць унукаў падарункамі. Набыла на рынку падарункавы набор — пакунак кукурузных палачак з укладзенай у сярэдзіну цацкай. Набор называўся «Лакі Бой» «Кукурузныя палачкі для хлопчыкаў». Вытворца — мінская фірма «Мун Лайт Эйч Эф Джэй Джэй». У якасці падарунка ў пакунку апынулася…калода картаў, пры гэтым зусім не дзіцячага зместу: на малюнках — дэман-бык, д’ябал Вада, дэман-бог вады Суга. Цацка, у адрозненне ад палачак, была кітайскага паходжання, таму тэкст на картах быў на досыць слабой расійскай мове. Але малюнкі і тлумачальны тэкст да іх выклікаюць пытанні. Напрыклад:
«Такі інструмент для допыту пад катаваннем, як нож з вострым трункам». І каментар да малюнка: «Захапіць нож з вострым трункам і пасекчы непрыяцеля надвое. Тэрарыстычны інструмент для допыту пад катаваннем».У дадатак да ўсяго, ад «падарунка» сыходзіць моцны атрутны хімічны пах, піша «ВБ».
Пра атрутны пах набораў «Лакі Бой» можна даведацца на форуме сайту Rebenok.by. Удзельніца форуму апісвае гісторыю з наборам для дзяўчынак, які набыла сваім дзецям.
Моцны непрыемны хімічны пах ад цацак, што знаходзіліся ў пакунку, доўга не маглі выветрыць з кватэры.
Варта адзначыць, што некаторыя цацкі «Мун Лайт Эйч Эф Джэй Джэй» фігуруюць ў спісе прадукцыі, адхіленай ад дзяржаўнай гігіенічнай рэгістрацыі ў лютым 2009 году аддзелам дзяржаўнай гігіенічнай рэгістрацыі Мінскага гарадскога цэнтру гігіены і эпідэміялогіі па выніках лабараторных даследаванняў. Так, партыя цацачных качак (3097 шт.) кітайскага вытворцы «Chenghai Shun Feng Long Toys Industrial Co. Ltd» не прайшлі гігіенічную рэгістрацыю праз перавышэнне ўзроўню міграцыі фенолу ў мадэльнае асяроддзе.
