16 ліпеня ў Вене на паседжанні Пастаяннага савета АБСЕ, па выніках справаздачы кіраўніка офіса АБСЕ ў Мінску пасла Шміта была зроблена заява Еўрасаюза па сітуацыі ў Беларусі. Ніжэй прыводзяцца вытрымкі з гэтай заявы.
« (…) 7 ліпеня суд вынес моладзеваму актывісту Арцёму Дубскаму, абвешчанаму ў гэтым годзе арганізацыяй «Міжнародная амністыя» вязнем сумлення, неапраўдана жорсткі прысуд і пазбавіў яго волі на адзін год за ўхіленне ад адбыцця пакарання ў выглядзе абмежавання волі, якое той атрымаў за ўдзел у дэманстрацыі 10 студзеня 2008 года. Еўрапейскі Саюз не перастае сцвярджаць, што Беларусь мусіць паважаць такія фундаментальныя свабоды чалавека, як свабода сходаў і асацыяцый. Крымінальны кодэкс РБ патрабуе перагляду з мэтай лепшага адлюстравання гэтых свабод і прывядзення ў адпаведнасць з еўрапейскімі стандартамі.
Еўрапейскі Саюз таксама выказвае занепакоенасць станам здароўя арыштаванага прадпрымальніка Мікалая Аўтуховіча, які, паводле звестак, галадае з 16 красавіка 2009 года. У гэтай сувязі Еўрапейскі Саюз станоўча ацаніў атрыманую паслом Шмітам магчымасць наведаць Аўтуховіча 29 мая ў следчым ізалятары. У той самы час мы звяртаемся да беларускіх улад з просьбай не пазбаўляць зняволенага магчымасці сустракацца з роднымі. Еўрасаюз просіць беларускія ўлады ўлічыць гуманістычны аспект гэтай справы і чакае хуткага прыняцця рашэння.
Занепакоенасць выклікае таксама вынясенне беларускім абласным судом 29 чэрвеня бягучага года смяротнага прысуду Васілю Язэпчуку. Мы настойліва заклікаем Беларусь да адмены смяротнага пакарання і прапануем, у якасці першага кроку, увесці мараторый на гэту меру.
Еўрапейскі Саюз атрымліваў розныя сігналы, што тычыцца рэгістрацыі палітычных партый і недзяржаўных арганізацый у Беларусі ў апошнія месяцы. Вітаючы рэгістрацыю Руху «За свабоду»,
мы ў той самы час лічым неабгрунтаванай адмову ў рэгістрацыі Беларускай хрысціянска‑дэмакратычнай партыі, праваабарончай арганізацыі «Наша вясна», Партыі свабоды і прагрэсу і, сярод апошніх, Асамблеі беларускіх прадэмакратычных няўрадавых арганізацый.
Еўрапейскі Саюз чакае ад Беларусі павагі да ўзятых на сябе абавязкаў па забеспячэнні плюралістычнага развіцця сродкаў масавай інфармацыі, уключна з прадстаўленнем незалежным газетам доступу да сістэмы дзяржаўнага распаўсюду і акрэдытацыяй замежных выданняў у краіне. У сувязі з гэтым Еўрапейскі Саюз заклікае Беларусь працягваць супрацоўніцтва з прадстаўніком АБСЕ па пытаннях свабоды прэсы і ў поўным аб’ёме выкарыстоўваць яго рэкамендацыі. (…) »
Поўны тэкст заявы Еўрасаюза на ангельскай мове можна знайсці на інфармацыйным партале, прысвечаным старшынству Швецыі ў Еўрасаюзе.
