28.07.2009 / 12:43

Чырвоны касцёл у Мінску зменіць выгляд 14

Аўтарам праекту стаў заслужаны архітэктар Беларусі Леанід Левін.

У Мінску пачынаецца пераўладкаванне тэрыторыі вакол касцёла святых Сымона і Алены, больш вядомага як Чырвоны касцёл. Як паведамляе БЕЛТА, аўтарам праекту стаў заслужаны архітэктар Беларусі Леанід Левін.

Паводле ягоных словаў, храм паўстане ў цалкам новым антуражы, у цэласным архітэктурным ансамблі. Касцёл будзе стаяць на велічным пастаменце, з мноствам прыступак. Яны будуць узыходзіць з трох бакоў, звернутых да плошчы Незалежнасці. Сімвалічная задума аўтараў — стварыць уражанне, што касцёл акружаны квітнеючым архітэктурным вянком.

Зменіцца і расстаноўка скульптурных элементаў вакол храма. Помнік чальцу Мінскага падполля — першаму ваеннаму рэдактару газеты "Звязда" Амельянюку — будзе перанесены на іншы бок касцёла. Такім чынам вызваліцца месца пад будучы помнік Яну Паўлу II. Перанясуць і скульптуру арханёла Міхаіла: яна зойме месца «Званоў Нагасакі», які таксама перамесцяць.

Нарэшце, цалкам знікне сцяна, якая адасабляе касцёл ад плошчы Незалежнасці, — тут будуць зробленыя прыступкі. Такім чынам, храм будзе ўзвышацца над зямлёй.

0
UsAnon / Адказаць
28.07.2009 / 13:07
Як глянеш, дык Чырвоны касцёл - проста пуп зямлі нейкі. І ўсё там "велічна" - улюбёнае слоўца патэра Завальнюка. І як гэта, цікава, ён "уламаў" улады замест помніка савецкаму падпольшчыку паставіць помнік антысаветчыку Вайтылу?
0
Artes / Адказаць
28.07.2009 / 14:57
Магчыма не пуп зямлі, але што пуп Беларусі - дакладна. Вазьміце хоць тое, што ў Чырвоным касьцёле быў заснаваны БНФ, які пасьля дамогся незалежнасьці Беларусі. Плян рэканструкцыі можна глянуць у Чырвоным касьцёле, там стаіць плякат. Зьбіраюцца дабудаваць прыбаньню (ля галерэі), якая ёсьць ў першапачатковым пляне і якую не пасьпелі пабудаваць. Мне асабіста не падабаецца ідэя ўсё навокал спляжыць пліткай, на пляне яна месцамі зялёная, месцамі чырвоная, з крыжамі ва ўзоры... Варта было б замяніць старую бэтонную плітку вакол касьцёла, на больш прыгожую, стылізаваную пад стары брук, а астатняе проста давесьці да ладу. Таксама, не падабаецца перанос скульптуры арханёла Міхаіла. Зараз, мне падаецца, ён стаіць ў ідэальным месцы і вельмі пасуе агульнай кампазыцыі. Я б усё ж хацеў, каб пры рэканструкцыі, Чырвоны касьцёл не страціў таго пачуцьця асаблівага, сакральнага месца, якое ён мае зараз.
0
UsAnon / Адказаць
28.07.2009 / 15:35
"ў Чырвоным касьцёле быў заснаваны БНФ" Не, шаноўны Artes, устаноўчы сойм БНФ адбыўся ў Вільні, а ў Чырвоным касцёле, дакладней, у частцы касцёла, размяшчаўся часовы перадвыбарчы агітцэнтр БНФ, у якім я таксама тады працаваў, часам з рана да вечара. Аздоблены касцёл цяпер абсалютна неэстэтычна і безгустоўна (чаго вартыя адныя начышчаныя да бляску і залакіраваныя бронзавыя шыльды і скульптура - няўжо ў патэра сапраўда настолькі дзікунскі густ?), таму асабіста ў мяне, у адрозненне ад Вас, не выклікае пачуцця сакральнага месца - нейкі нафаршыраваны безліччу эклектычных дэталяў турыстычны аб'ект, сумешчаны з камбінатам рытуальных паслугаў. А бетонная плітка - гэта наогул жах: няўжо няма грошай на натуральны камень і нармальны брук прынамсі на галоўнай плошчы краіны? Чым перастаўляць помнікі, сапраўды лепш было б упарадкаваць тэрыторыю ў гістарычным кантэксце аб'екта.
Паказаць усе каментары/ 14 /
Каб пакінуць каментар, калі ласка, актывуйце JavaScript у наладах свайго браўзеру