28.07.2009 / 14:56

Сямашка: У рабоце прамысловасці наступіла стабілізацыя 3

У рабоце айчыннай прамысловасці наступіла стабілізацыя. Аб гэтым на пасяджэнні Савета міністраў 28 ліпеня заявіў першы віцэ‑прэм’ер Уладзімір Сямашка.

Падводзячы вынікі работы прамысловасці за шэсць месяцаў, ён адзначыў, што ў большасці галін «намецілася стабілізацыя, спынілася падзенне аб’ёмаў прамысловай вытворчасці». Паводле слоў Сямашкі, за першае паўгоддзе створаны рэальныя перадумовы для пераходу ў якасна новы стан.

Намечана, што да канца 2009 года прадпрыемствы павінны выйсці на леташні ўзровень аб’ёмаў прамысловай вытворчасці. «Аб’ём прамысловай вытворчасці з 96,4% па выніках першага паўгоддзя павінен вырасці да 99—100% да канца года», — заявіў першы віцэ‑прэм’ер. Разам з тым пры нарошчванні «ад месяца да месяца аб’ёмаў прамысловай вытворчасці з’явілася магчымасць для скарачэння складскіх запасаў», сказаў ён.

«Большасць прадпрыемстваў прыйшла ў паўнаважкі стан, калі ўся вырабленая на працягу месяца прадукцыя рэалізуецца. У сувязі з чым запаволіўся тэмп росту складскіх запасаў», — падкрэсліў Сямашка.

Паводле звестак Белстата, на 1 ліпеня гэтага года на складах сабралася прамысловай прадукцыі на суму 7,4 трлн. рублёў. Суадносіны запасаў гатовай прадукцыі да сярэднямесячнага аб’ёму вытворчасці склалі 94,6% (у першым паўгоддзі 2008 года — 49,9%). Разам з тым калі за май складскія запасы выраслі амаль на 184 млрд. рублёў, то за чэрвень — усяго на 91 млрд. рублёў.

Як заявіў Уладзімір Сямашка, да канца года суадносіны запасаў гатовай прадукцыі да сярэднямесячнага аб’ёму вытворчасці павінны знізіцца да 75%. Такі аптымізм, паводле слоў першага віцэ‑прэм’ера, грунтуецца на тым, што «прадпрыемствы прадаюць амаль усё, што вырабляюць».

БелаПАН

0
Крывіч / Адказаць
28.07.2009 / 15:50
Дакладней было сказаць, сталібеЗЕЦ
0
Кнехт / Адказаць
28.07.2009 / 19:56
«прадпрыемствы прадаюць амаль усё, што вырабляюць». -------------------- тым, хто вырабляе - пасаромеўся дадаць ён.
0
Людмила / Адказаць
29.07.2009 / 10:23
Якая можыць быць стабiлiзацыя, калi працуюць рабочыя па 3, 4 днi у нядзелю???
Каб пакінуць каментар, калі ласка, актывуйце JavaScript у наладах свайго браўзеру