Еўракамісар Фэрэра‑Вальднэр паведаміла, што дапамога Беларусі «можа адбывацца па лініі Міжнароднага валютнага фонду».
Міністр замежных справаў Беларусі Сяргей Мартынаў другі раз цягам году наведаў Брусель. І зноў — для сустрэчы з «еўратройкай».
28 ліпеня ў бельгійскай сталіцы міністр сустракаўся з вярхоўным камісарам замежнай палітыкі і палітыкі бяспекі Хаўерам Саланам, еўракамісарам у пытаннях палітыкі добрасуседства і пашырэння Бенітай Ферэра‑Вальднэр і кіраўніком знешнепалітычнага ведамства Швецыі Карлам Більдтам. Швецыя старшынюе ў саюзе 27 незалежных дзяржаваў.
Па завяршэнні перамоваў удзельнікі адказалі на пытанні журналістаў. Найперш спн.Ферэра‑Вальднер адзначыла, што
Еўрасаюз гатовы падтрымліваць Беларусь, калі наша краіна «прадэманструе сур’ёзны рух у накірунку дэмакратыі і фундаментальных свабод».
Еўрасаюз не зусім задаволены станам рэчаў у Беларусі. Шведскі міністр Більдт зазначыў, што сітуацыя ў Беларусі на сёння «не адпавядае чаканням».
«Беларускія ўлады могуць і ў прынцыпе павінны зрабіць больш для ўмацавання адносін з ЕС», — дадаў Карл Більдт.
У верасні Еўрасаюз пачне вывучаць сітуацыю ў Мінску па пяці асноўных пунктах (адсутнасць палітвязняў, свабода СМІ, змены выбарчага заканадаўства, паляпшэнне працы недзяржаўных арганізацый і гарантыя свабоды сходаў і палітычных аб’яднанняў). Па выніках праверкі ў лістападзе і будзе вырашана, ці працягваць санкцыі супраць беларускіх чыноўнікаў.
«Мы ўжо прадэманстравалі нашу добрую волю, калі падвоілі фінансавую дапамогу Беларусі з 5 да 10 мільёнаў еўра, і мы хочам зрабіць тое самае ў 2010 годзе, асабліва падтрымаўшы паляпшэнне якасці беларускіх прадуктаў, бо гэта важна для беларусаў, каб яны маглі экспартаваць прадукты ў Еўрасаюз», — зазначыла Ферэра‑Вальднер, адказваючы на пытанне пра эканамічнае супрацоўніцтва.
Што датычыць наўпроставай грашовай дапамогі ЕС, то еўракамісарка сказала, што гэта «можа адбывацца па лініі МВФ».А ў будучыні магчымыя атрыманне крэдытаў у Еўрапейскім банку рэканструкцыі і развіцця і Еўрапейскім інвестыцыйным банку.
Яшчэ 19 ліпеня прадстаўнікі МВФ заявілі, што Мінск больш не мае патрэбы ў дадатковым замежным фінансаванні, з улікам тых крэдытаў, што былі выдадзены ці былі паабяцаныя.
Ферэра‑Вальднер сказала, што ЕС можа шмат чаго прапанаваць Беларусі ў розных галінах, у прыватнасці ў сферы макраэканомікі, энергетыкі, гандлю, аблягчэння візавага рэжыму. Яна зазначыла, што патэнцыял у стасунках паміж Беларуссю і Еўрасаюзам яшчэ вельмі вялікі. Аднак развівацца далейшым адносінам замінае няўпэўненасць еўрапейцаў, што ў Беларусі адбываюцца незваротныя рэформы.
«І Беларусь, і ЕС разлічваюць, што кожны з бакоў будзе з большай хуткасцю ісці насустрач чаканням іншага», – адказаў на гэта Мартынаў.Ён акцэнтаваў пытанне дарагавізны візаў. Ягоны шведскі калега парыраваў, што гэтае пытанне залежыць ад волі беларусаў.
Нежаданне ЕС выдзяляць крэдыт лукашэнкаўцам азначае, што фінансавая сітуацыя ў Беларусі да канца году будзе заставацца нестабільнай. Далейшая дэвальвацыя рубля не выключаная.
Цяпер чытаюць
Ад 300 000 да 500 000 даляраў. Стала вядома, хто прывёз Джэйсана Дэрула ў Беларусь4
Каментары