05.08.2009 / 15:57

Пісьменнікі згнаілі цэлую галерэю 32

Колісь гэтыя вялікія партрэты класікаў беларускай літаратуры — Коласа, Купалы, Шамякіна ды іншых — упрыгожвалі Дом літаратара.

Восемдзесят чатыры партрэты літаратараў могуць быць страчаныя.

Пісьменнікі выносяць партрэты класікаў.
30 жніўня 2006 г., фота Юліі Дарашкевіч.

Колісь гэтыя вялікія партрэты класікаў беларускай літаратуры — Коласа, Купалы, Шамякіна ды іншых — упрыгожвалі Дом літаратара. Калі ў 2006 годзе апальны Саюз беларускіх пісьменнікаў змушаны быў пакінуць будынак, яго маёмасць перавезлі ў Дом творчасці «Іслач», што ў Валожынскім раёне.

Будынак знаходзіцца ў аварыйным стане, яго неаднаразова залівала. І, як вынік, карціны і кнігі, што захоўваліся ў сутарэннях, вымаклі ды пакрыліся цвіллю.

«Такіх, якія б былі зусім не пашкоджаныя, няма», — кажа захавальніца фондаў Лідскага гісторыка‑мастацкага музея Валянціна Хацяновіч. У Ліду маёмасць СБП трапіла ў мінулую пятніцу. Былы Дом творчасці пісьменнікаў «Іслач» купіла ТАА «Белінтэхбуд», і новы гаспадар запатрабаваў, каб пісьменнікі забралі свае рэчы.

Калі б не гэтая акалічнасць, карціны і кнігі працягвалі б гнісці ў сутарэнннях «Іслачы». Як кажа кіраўнік Саюза беларускіх пісьменнікаў Алесь Пашкевіч, кнігі і карціны не вывозілі, бо «да апошняга чакалі вырашэння пытання з Домам творчасці: застанецца ён ва ўласнасці арганізацыі ці не».

А пасля яшчэ амаль год вывозіць «не было куды».

Толькі калі новы гаспадар паабяцаў выкінуць маёмасць СБП на сметнік, магчымасць знайшлася. У Лідзе ствараецца музей «Лідчына літаратурная». Праца па яго стварэнні вядзецца пры ўдзеле Лідскага гісторыка‑мастацкага музея, туды і адвезлі часова партрэты пісьменнікаў.

Кнігі з «Іслачы», а гэта больш за 2000 асобнікаў, пакуль перадалі ў рэдакцыю газеты «Наша Слова».

У лідскім музеі няма свайго мастака‑рэстаўратара. Каб выратаваць партрэты, трэба шукаць спецыялістаў у Гродне ці Мінску. «Я за тое, каб адкінуць убок пытанне хто вінаваты, — кажа стваральнік аналагічнага прыватнага музея ў Старых Дарогах Анатоль Белы. — Трэба ратаваць гэтыя карціны і кнігі. Калі своечасова не аддаць іх рэстаўратару, яны проста знікнуць». Адзіны выхад спадар Белы бачыць у тым, каб звярнуцца па дапамогу ў Міністэрства культуры, пры якім працуе рэстаўрацыйная лабараторыя.

СМ

Хочаш падзяліцца важнай інфармацыяй ананімна і канфідэнцыйна?

0
кнігалюб / Адказаць
05.08.2009 / 16:06
Забралі, каб Чаргінцу не дасталося? Ні сабе, ні сьвету. Затое палітычна очань было гучна. З сьлязой.
0
мінак / Адказаць
05.08.2009 / 16:32
Пытаньне “хто вінаваты?” нават вельмі да месца. Бо незразумела, дзеля чаго робяцца падобныя рэчы: дзеля ўласнага PR ці дзеля справы? Выглядае, апазыцыйнасьць да ўлады ані ня значыць аўтаматычнай “нацыянальнай сьведамасьці”, якая перш-наперш кіруецца думкаю пра захаваньне, зьберажэньне і г. д. беларускіх каштоўнасьцяў. Нагадвае Сьвятлоўскае (мова арыгіналу): Принимали в Союз писателей человека малоспособного, но пробивного. Светлов высказался против, кто-то защитил: - Но ведь его стихи посвящены важной солдатской теме. - Когда я читаю хорошие стихи о войне, – возразил Светлов, – я вижу: если ползет солдат, то это ползет солдат. А тут ползет... Мы не спрашиваем, кто. Мы спрашиваем, куда?
0
Ліхвяр / Адказаць
05.08.2009 / 16:40
Чаргінец не зразумеў бы што гэта за "дзядзькі" і "цёцькі" на партрэтах і спаліў бы, або выкінуў на сметнік.
Паказаць усе каментары/ 32 /
Каб пакінуць каментар, калі ласка, актывуйце JavaScript у наладах свайго браўзеру