На нарадзе па працы Пракуратуры, што адбылася ў Аляксандра Лукашэнкі, многія прамоўцы закраналі праблему нібыта маючага месца пагаршэння якасці следства. Яны выказваліся за стварэнне адзінага следчага камітэта, падпарадкаванага непасрэдна прэзідэнту краіны.
Сам Лукашэнка адкаментаваў гэта наступным чынам: «Магчыма, горш не будзе, калі мы створым магутны следчы камітэт, падпарадкаваны непасрэдна прэзідэнту і паднаглядны генеральнаму пракурору, але ці не страцім мы нешта за той час, пакуль такі орган будзе стварацца? Другі момант: цяпер следства вядзецца ў розных структурах, і такім чынам выкарыстоўваецца не толькі матэрыяльная, але і інтэлектуальная база гэтых самых розных падраздзяленняў — гэта таксама станоўчы фактар. Аднак, калі такое ўзнікла пытанне, значыць адкладаць яго нельга. Трэба ўважліва яшчэ раз яго разгледзець, і калі патрэбны новаўвядзенні, то рабіць усё трэба менавіта цяпер», — заўважыў ён.
У выніку ён даручыў Адміністрацыі прэзідэнта, дзяржсакратарыяту Рады Бяспекі і Пракуратуры ў трохмесячны тэрмін перагледзець сістэму органаў пракуратуры з мэтай аптымізацыі.
