14 жніўня Аляксандр Лукашэнка правёў нараду па пытаннях удасканальвання заканадаўства ў сферы барацьбы са злачыннасцю.
Лукашэнка лічыць, што размеркаванне паўнамоцтваў па расследаванні тых ці іншых забойстваў патрабуюць істотнай карэкціроўкі, паведамляе прэс-служба кіраўніка дзяржавы.
Цягам апошняга году былі праведзеныя праверкі КДБ, МУС, пракуратуры. «Яны выявілі шэраг праблем і адначасова вызначылі далейшыя работы па ўдасканальванні гэтых органаў», — зазначыў Лукашэнка.
Найбольш дасталася пракурорскім работнікам. На думку беларускага лідэра, пракурорскія санкцыі вельмі часта не выратоўваюць ад беззаконня, то бок не выконваюць свае функцыі. Лукашэнка зазначыў, што часта пракуроры фармальна падпісваюць санкцыі. А ў сваю чаргу супрацоўнікі міліцыі і спецслужбаў перакладваюць адказнасць наконт абгрунтаванасці аператыўна‑вышуковых і працэсуальных дзеянняў на пракурораў.
Прывёў Лукашэнка і адваротныя прыклады, калі пракуроры наўмысна замаруджвалі падпісванне санкцый ці ўвогуле адмаўляліся іх падпісваць для своечасовага папярэджання злачынства і прыцягненне да адказнасці вінаватага.
Кіраўнік дзяржавы лічыць неабходным унесці змены ў заканадаўства, якія б дазвалялі па карупцыйных злачынствах весці папярэдняе следства тым органам, якія крымінальную справу распачыналі, а не толькі пракуратуры.
Паведамляецца, што норму, якая дае права здзяйсняць аператыўна‑вышуковыя мерапрыемствы, прымяняць рашэнні па меры ўтрымання і здзяйсняць асобныя працэсуальныя дзеянні па пастановах міністра ўнутраных справаў, старшыні КДБ і дырэктара дэпартамента фінансавых расследаванняў, падтрымлівалі не ўсе.
«Незразумела, што тут такога надзвычайнага: няўжо кіраўнікі такога высокага ўзроўню менш кампетэнтныя, чым пракурор, які дае санкцыю?», — задаваўся пытаннем Лукашэнка. На ягоны погляд, матывацыя адна — выкананне законнасці.
Лукашэнка выступіў за стварэнне бліжэйшым часам асобнага Следчага камітэту. Ні ў Вадзіма Зайцава, ні ў Анатоля Куляшова ніякіх пярэчанняў адносна павелічэння паўнамоцтваў не было.
Старшыня Канстытуцыйнага суду Пётр Міклашэвіч лічыць, што дадзеныя праекты ніяк не супярэчаць Канстытуцыі, а таксама міжнародным стандартам.
Быў дадзены загад да 1 студзеня 2010 году завяршыць працу над законапраектам, які ўнясе змены ў аператыўна‑вышуковую дзейнасць. Выглядае на тое, што робіцца гэта з прыцэлам на прэзідэнцкія выбары.
