19 жніўня на тэрыторыі гміны Крынкі Падляскага ваяводства Польшчы пройдзе міжнародны валанцёрскі лагер «Адновім мультыкультурную гармонію», удзел у якім возьмуць актывісты грамадзянскай ініцыятывы «Гомельскі дэмакратычны форум».
Як паведаміў БелаПАН беларускі каардынатар праекта Пётра Кузняцоў, мерапрыемства стала магчымым дзякуючы цеснаму супрацоўніцтву аб’яднання на карысць зямлі падляскай «Друмля» і Гомельскага дэмакратычнага форуму. Абедзве арганізацыі ўжо былі ўдзельніцамі аналагічнага праекта летась, і ў сувязі з яго поспехам было прынята рашэнне аб працягу праграмы.
Паводле слоў Кузняцова, на працягу двух тыдняў валанцёры з Беларусі, Германіі і Польшчы будуць займацца аднаўленнем культурных і архітэктурных помнікаў на тэрыторыі гміны Крынкі Падляскага ваяводства.
Галоўнай мэтай праекта з’яўляецца фарміраванне разумення ў сучаснай моладзі Еўропы каштоўнасці агульнай гісторыі, цярпімасці да прадстаўнікоў іншых нацыянальнасцей і культур, павагі да прадстаўніком іншых народаў і іх гісторыі. «З гэтага пункту гледжання Крынкі, якія цяпер знаходзяцца пад польскай юрысдыкцыяй, з’яўляюцца ледзьве ці не ідэальным месцам. Гэтая мясцовасць — гістарычна шматкультурны і шматнацыянальны рэгіён. На працягу стагоддзяў тут кампактна пражывала беларускае, польскае, літоўскае і яўрэйскае насельніцтва», — растлумачыў беларускі каардынатар.
Паводле яго слоў, падчас Другой сусветнай вайны большасць мясцовых жыхароў‑яўрэяў былі знішчаны ў гета, і на гэты час у Крынках няма яўрэйскага насельніцтва. Таму аднаўляць мультыкультурную гісторыю мясцовасці валанцёрам давядзецца па крупінках успамінаў нешматлікіх відавочцаў і матэрыяльных сведчанняў, што захаваліся.
Падчас праекта плануецца апытаць мясцовых жыхароў, сістэматызаваць атрыманыя звесткі, правесці аднаўленчыя і кансервацыйныя работы на мясцовых яўрэйскіх могілках (кіркуце) і ў будынку мясцовай сінагогі.
