21.08.2009 / 10:58

Каранацыя абраза Маці Божай Валадаркі Азёраў 1

Браслаў, 21‑22 жніўня.

21-22 жніўня ў Браславе адбудзецца каранацыя абраза Маці Божай Валадаркі Азёраў. Абраз стане першым каранаваным у Віцебскай вобласці і сёмым — у Беларусі.

Да гэтага кароны былі ўскладзены на шэсць абразоў: Маці Божай Берасцейскай (1996 г.), Маці Божай Лагішынскай (1997 г.), Маці Божай Будслаўскай (1998 г.), Маці Божай Кангрэгацкай у Фарным гродзенскім касцёле (2005 г.), Маці Божай Гудагайскай (2007 г.), Маці Божай Тракельскай (2009 г.). На ўрачыстасць прыедуць усе беларускія біскупы, а таксама кардынал Майснер з Нямеччыны, асабісты сябар Папы Бенедыкта XVI.

0
Ihar Baranouski / Адказаць
22.08.2009 / 00:26
І ўсё такі гэты абраз будзе ўжо ДЗЯВЯТЫМ каранаваным у Беларусі, а ня сёмым! Першым каранаваным абразом у Беларусі стаў Жыровіцкі абраз, які здаўна шанавалі прадстаўнікі трох канфесіяў: грэка-каталіцкай, праваслаўнай і рыма-каталіцкай. З блаславеньня Папы Рымскага Клімента XII каранацыя гэтага абраза залатымі каронамі з каштоўнымі камянямі адбылася 19 верасьня (8 верасьня па старым стылі, на сьвята Нараджэньня Маці Божай) 1730 году. Каранацыю залатымі каронамі, выкананымі ў Рыме, зьдзейсьніў Кіеўскі мітрапаліт Ўніяцкай Царквы Апанас Шаптыцкі ў прысутнасьці пасланьніка папы, двух уніяцкіх біскупаў (Тэафіла Гадэбскага, біскупа Ўладзімірскага і Берасьцейскага, ды Юрыя Булгака, біскупа Пінскага і Тураўскага), а таксама шматлікага духавенства абодвух абрадаў і некалькіх дзясяткаў тысячаў вернікаў. У памяць пра гэтую вялікую ўрачыстасьць былі адліты памятныя медалі. Другім каранаваным стаў Бялыніцкі абраз Маці Божай - 20 верасня 1761 г. (каранатарам зьяўляўся Юры Мікалай Гільзен, біскуп Смаленскі). На жаль, пазьней гэты абраз зьнік і лёс яго невядомы. Кожны абраз можа быць каранаваны толькі адзін раз. Абразы, якія атрымалі дазвол на каранацыю, павінны былі не толькі ЗДАЎНА ўшаноўвацца, але і славіцца як цудадзейныя. Таму як першым каранаваным абразом у Беларусі стаў (і ёсьць) Жыровіцкі абраз, ён і застаецца найбольш шанаваным у сучаснай Беларусі, бо мае найдаўжэйшую традыцыю шанаваньня, якая працягваецца. Трэцім каранаваным цудадзейным абразом на тэрыторыі сучаснай Беларусі стаў абраз Маці Божай Берасьцейскай (1996 г.). Ён распачаў сьпіс каранаваных абразоў у Рэспубліцы Беларусь. Уласна за часы незалежнасьці Рэспублікі Беларусь каранацыя Браслаўскага абразу будзе сёмай.
Каб пакінуць каментар, калі ласка, актывуйце JavaScript у наладах свайго браўзеру