Палітык Алесь Міхалевіч мае намер вылучыць сваю кандыдатуру на прэзідэнцкія выбары 2010-11 гадоў.Пра гэта ён заявіў у часе з’езду Партыі БНФ у суботу. З самой партыі яго выключылі праз канфлікт з Вінцуком Вячоркам і Лявонам Баршчэўскім. Таму на з’ездзе ён выступаў як намеснік старшыні грамадскага аб’яднання БНФ «Адраджэнне».
«Наша Ніва»: Алесь, калі вырашыў балатавацца на пасаду прэзідэнта?
Алесь Міхалевіч: Яшчэ летась.
«НН»: Як ацэньваеш свае шанцы на перамогу?
АМ: Яны ёсць, і будуць павялічвацца цягам правядзення эфектыўнай выбарчай кампаніі.
«НН»: Ты ўжо пачаў гэтую кампанію?
АМ: Не, яна пачнецца пасля афіцыйнага абвяшчэння. Сёння я пра гэта паведаміў толькі сваім бліжэйшым паплечнікам з Партыі БНФ. Афіцыйнае абвяшчэнне будзе цягам месяца.
«НН»: Хто твая каманда?
АМ: Гэта малавядомыя людзі, якія адбыліся ў сваім прафесійным жыцці, якія зарабляюць немалыя грошы. Гэта праграмісты, журналісты, прадпрымальнікі. Людзі, якія працуюць у абсалютна розных галінах, але якіх аб’ядноўвае агульнае бачанне будучыні Беларусі.
«НН»: То бок яны беспартыйныя?
АМ: У абсалютнай сваёй большасці так. Таксама ў абсалютнай большасці — гэта людзі маладыя.
«НН»: А з Мілінкевічам як твае адносіны далей будуць развівацца?
АМ: Мы знойдзем паразуменне. Прынамсі, я збіраюся весці сваю выбарчую кампанію да пераможнага канца.
«НН»: Якія ў цябе будуць лозунгі, тэмы?
АМ: Пра гэта будзе сказана на афіцыйнай прэзентацыі.
