Пра гэта заявіў 22 верасня прэм’ер‑міністр Беларусі Сяргей Сідорскі на сустрэчы з кіруючым дырэктарам банка АКА «Аўсфюркрэдыт‑ Гезельшафт» Гансам‑Ёргам Тотам.
«Мы не здымаем амбіцыйных задач, якія пастаўлены беларускім урадам перад эканомікай. Мы прадоўжым рэалізацыю інвестыцыйных і інавацыйных праграм на бліжэйшыя 3‑5 гадоў», — сказаў прэм’ер‑міністр. Ён адзначыў, што пры агульным спадзе эканомік суседніх дзяржаў тэмп росту інвестыцый у Беларусі складае сёлета амаль 117 працэнтаў. У сувязі з гэтым інвестыцыі з’яўляюцца важнейшым элементам для рэалізацыі праграм.
Паводле слоў Сяргея Сідорскага, Германія для Беларусі — адна з вядучых краін‑партнёраў. За 7 месяцаў двухбаковы тавараабарот перасягнуў 1 млрд. еўра. У Беларусі створана 352 прадпрыемствы з удзелам нямецкага капіталу, яны паспяхова працуюць.
Сяргей Сідорскі пацвердзіў гатоўнасць урада і ў далейшым працаваць з банкам АКА. Ён таксама падзякаваў кіраўніцтву банка за аб’ектыўную ацэнку дзеянняў беларускага ўрада. У сакавіку і верасні АКА перагледзеў крэдытны партфель для Беларусі і павялічыў ліміты для нашай краіны.
Паводле слоў Сяргея Сідорскага, інвеставаныя сродкі былі накіраваны ў рэальную эканоміку. 21‑22 верасня кіраўніцтва банка АКА азнаёмілася з паказчыкамі работы вядучых прадпрыемстваў Беларусі, якім была аказана крэдытная падтрымка банка. Гэта прадпрыемствы машынабудавання, мікраэлектронікі, перапрацоўчай прамысловасці.
У цэлым Сяргей Сідорскі нагадаў, што Беларусь сусветны фінансавы крызіс таксама не абмінуў.
Аднак у краіне распрацавана добрая антыкрызісная праграма, якая апраўдала сябе. Ужо цяпер многія краіны заяўляюць аб хуткім выхадзе з крызісу.
«Мы ставімся да гэтага пытання аб’ектыўна і робім усё, каб эканоміка Беларусі адчувала сябе больш упэўнена. Пацвярджэннем таго з’яўляецца тое, што ВУП Беларусі ў бягучым годзе знаходзіцца ў межах узроўню 2008 года, гэта значыць фактычна мы ідзём па планцы мінулага года», — сказаў прэм’ер‑міністр.
Беларусь праводзіць рэформы, якія высока ацэньваюцца Сусветным банкам і іншымі фінансавымі інстытутамі. У прыватнасці, у апошняй справаздачы Сусветнага банка Беларусь заняла 58‑е месца ў рэйтынгу краін з найбольш спрыяльнымі ўмовамі вядзення бізнесу. Нагадаем, наша краіна плануе ўвайсці ў трыццатку краін з найлепшым бізнес‑кліматам.
Акрамя таго, на сустрэчы было закранута пытанне аб магчымасці пераходу Беларусі з сёмай у шостую групу рызыкі па інвесціраванню. Кіруючы дырэктар банка АКА лічыць, што ў цэлым гэта магчыма. «Мы не рады таму, што Беларусь сёння адносіцца да гэтай катэгорыі», — падкрэсліў Ганс‑Ёрг Тот
