Пасольства Італіі праводзіць культурную акцыю «Італьянаскае Адраджэнне ў Беларусі». Як паведамляе прэс-служба пасольства, акцыя пройдзе з 1 кастрычніка па 14 лістапада.
У яе рамках запланавана выстава ў Нацыянальным мастацкім музеі палатна Парыса Бардоне «Мадонна з немаўлём паміж св. Энрыка з Упсалы і св. Антоніа», якая прадстаўлена музеем Corrado Giaquinto (правінцыя Бары).
«Гэта праца — адна з вяршыняў сталага таленту мастака, які арыгінальным спосабам перапрацоўвае ўплыў Джарджоне і Тыцыяна. Карціна таксама ілюструе геаграфію жыцця Боны Сфорцы ад італьянскіх земляў Ламбардзіі і Апуліі да былых тэрыторый Вялікага Літоўскага княства», — гаворыцца ў прэс-рэлізе пасольства.
3 кастрычніка ў Нясвіжы і Міры і 4 кастрычніка ў Мінску пройдзе выступленне сцяганосцаў з Кавы ды Тырэні (Салерна).
19 кастрычніка ў Музеі кнігі ў Нацыянальнай бібліятэцы адкрыецца выстава, прысвечаная выдадзеным у Італіі інкунабулам і кнігам XVI стагоддзя, якія захоўваліся ў прыватных і царкоўных бібліятэках Беларусі.
31 кастрычніка на сцэне Нацыянальнага акадэмічнага тэатра імя Янкі Купалы калектыў Малага тэатра з Мілана прадставіць п’есу Карла Гальдоні «Арлекін — слуга двух гаспадароў» у пастаноўцы Джорджа Штэхлера.
Акрамя таго, у рамках праекта «Італьянскае Адраджэнне ў Беларусі» пройдзе кангрэс італьянска-беларускіх дабрачынных асацыяцый, бізнэс-форум «Найбольш перспектыўныя магчымасці гандлёва-эканамічнага супрацоўніцтва паміж Італіяй і Беларусью», канцэрт гурта Tenores.
Таццяна Каравянкова, БелаПАН
