«Яшчэ хлусня з Мінска». Пад такім загалоўкам расейскі місіянер Андрэй Кураеў зрабіў запіс на сваім блогу пра матэрыял НН пра яго візіт у Беларусь. Словы адносяцца да інтэрв’ю, якое дыякан даў «НН» падчас свайго нядаўняга візіту ў беларускую сталіцу.
Андрэй Кураеў
«Хлусня ў загалоўку, які даў аўтар — каталік-паляк. Вынесены ў загаловак тэзіс, пададзены як мае словы, нічога супольнага не мае з маімі рэальнымі словамі»,
— піша дыякан.
Звярніце ўвагу, як прафесар Маскоўскай духоўнай акадэміі палічыў, што аўтарам такога нячэснага інтэрв’ю можа быць толькі паляк-каталік. Чаму дыякан уявіў аўтара інтэрв'ю каталіком і нават палякам? На пытанне аднаго з блогераў, адкуль звесткі пра прыналежнасць аўтара да гэтай нацыянальнасці, ён даў проста ашаламляльны адказ: «Пра гэта я даведаўся ў адным з беларускіх ЖЖ». Ну, у мяне проста ад сэрца адлягло.
Я баяўся, што ў духоўнай акадэміі вучаць па паху ад чалавека вызначаць яго нацыянальную прыналежнасць. Вымуштроўваюць, выбачаюся за параўнанне, як сабакаў на наркотыкі. Але ж не. Усё куды прасцей.
Добра, буду ведаць, што я, аказваецца, каталік і яшчэ й паляк. Маме раскажу.
Але ж што магло так пакрыўдзіць дыякана Кураева ў падрыхтаваным мной матэрыяле, у якім ён сышоў ад адказу на пытанне, чаму Расейская праваслаўная царква амаль не ўжывае беларускай мовы ў храмах, але правёў паралелі з сітуацыяй, калі самі прыхаджане мовы не хочуць: «…у праваслаўных храмах выбар ідзе паміж беларускай і царкоўнаславянскай. Але сама парафія і духавенства робяць гэты выбар. Беларуская царква не супраць службы на роднай мове. Пытанне ў тым, ці ёсць тут кансалідаванае жаданне прыхаджан у гэтым». НН мела падставу інтэрпрэтаваць гэтае выказванне так, як тое зроблена ў загалоўку? Блогер john_cupala параіў дыякану Кураеву падвучыць логіку. Хаця я не сумняваюся, што з логікай у дыякана Кураева ўсё ў парадку.
Проста не хоча ён атаясамліваць сябе з русіфікатарскай палітыкай праваслаўнай царквы ў нашай краіне. Але пайсці супраць гэтай палітыкі — не хапае моцы. Вось і прыходзіцца бараніць метады сваіх калегаў.
Сваім допісам Андрэй Кураеў выклікаў бурнае абмеркаванне, да якога далучыліся перадусім беларускія блогеры. Адны, праўда, скарысталі блог дыякана выкарыстаць як пляцоўку для прасоўвання сваіх ідэй. Не ўсе з іх пагадзіліся з меркаваннем, што аўтар НН такі паскудны, таму што ён каталік дый яшчэ — Госпадзе Ісусе — паляк. Gorliwy_litwin (Алесь Белы) ведае Рэдакцыю НН нашмат лепей за прававерных дыяканаў з Масквы, як інсайдэр. Пісаў у НН. НН нават назву кнігі яму прыдумала. Дык ён дыякана Кураева ўдакладніў. Не каталікі-палякі. НН чытаюць... (!) «відавочныя альбо падсвядомыя неаязычнікі. Канечне, выпадкова да іх трапляюць і непаздаравелыя хрысціяне, але для гэтага распрацавана вытанчаная схема двайнога мыслення, то бок праграмныя ўстаноўкі бел. нацыяналізму глыбінна супярэчаць і лацінскай, і візантыйскай цывілізацыі».
На шчасце, знайшліся і блогеры, якія глядзяць на рэчаіснасць інакш. Яны і расставілі кропкі над «і».
