Узровень захворвання на ВРВІ і грып у Мінску працягвае падаць. Пра гэта сведчаць звесткі, размешчаныя на сайце Санітарна-эпідэміялагічнай службы Мінска.
Паводле звестак санслужбы, 6 лістапада па дапамогу да медыкаў звярнуліся 8.910 жыхароў Мінска (5 лістапада — 10.198), дыягназ ВРВІ пастаўлены 6.418 (7.474), грып — 2.492 (2.724).
Большасць хворых — дарослыя (5.865 чалавек) і дзеці ад 3 да 6 гадоў (1.124).
У пятніцу шпіталізаваныя 138 хворых (днём раней — 175), з іх з дыягназам ВРВІ — 127 (152), грып — 11 (23). Большасць шпіталізаваных — дзеці да двух гадоў (52 чалавекі) і дарослыя (39).
Нагадаем, з 6 лістапада ў Мінску ўведзены «дадатковыя супрацьэпідэмічныя мерапрыемствы», па 11 лістапада ўключна прадоўжаны школьныя канікулы.
Пры гэтым эпідэмія грыпу афіцыйна не аб'яўлена.
Між тым сталічныя медыкі прагназуюць другую і трэцюю хвалю захворвання. 6 лістапада старшыня камітэта па ахове здароўя Мінгарвыканкама Дзмітрый Піневіч падчас онлайн-канферэнцыі заклікаў мінчан рабіць прышчэпкі ад грыпу.
Паводле яго звестак, каля 100 тысяч мінчан ужо зрабілі такія прышчэпкі, у тым ліку прыкладна 5 тысяч чалавек — за кошт асабістых сродкаў. У пачатку наступнага тыдня плануецца прышчапіць яшчэ 77 тысяч чалавек, паведаміў Піневіч.
Вакцынацыя ажыццяўлялася ў асноўным з выкарыстаннем жывой грыпознай вакцыны расійскай вытворчасці і нямецкай вакцыны «Флюарыкс», закупленых за кошт сродкаў рэспубліканскага бюджэту.
Згодна з афіцыйнымі звесткамі, з пачатку ўздыму захворвання 19 кастрычніка ад пнеўманіі ў Беларусі памерлі 19 чалавек, у сямі з іх лабараторна пацверджаны вірус грыпу А (H1N1). У цэлым па краіне выяўлена 85 выпадкаў свінога грыпу.
