Лідэр Паўночнай Карэі Кім Чэн Ір не зьяўляецца на публіцы ўжо больш за месяц, з 4 ліпеня. Сын Сонца Нацыі зьнік з вачэй грамадзкасьці да дзень да выпрабаваньня ракетаў, што, як памятаем, ажыцьцявілі 5 ліпеня. Апошні раз яго бачылі падчас наведваньня шыннага заводу.
СМІ Паўночнай Карэі ніводнага разу не паведамілі з таго часу пра якую-небудзь падзею, у якой бы браў удзел лідэр краіны. Адзіным выняткам стала паведамленьне ад прывітаньні дасланым Кім Чэн Ірам ў адрас Фідэля Кастра.
Раней Кім Чэн Ір меў звычку па некалькі разоў у месяц наведваць розныя вайсковыя часткі для падтрыманьня маральнага духу. Так, за мінулы год з 131 публічнага зьяўленьня на публіцы лідэра КНДР 70 былі зьвязаныя з ваеннай тэматыкай. Сёлета 52 разы з 69 Кім Чэн Ір сустракаўся з ваеннымі.
Ягонае зьнікненьне ужо нарадзіла велізарную колкьасьць чутак, у прыватнасьці, замежныя назіральнікі адзначаюць, што Кім Чэн Ір хаваецца ў падземным бункеры, баючыся амэрыканскага ўдару ў адказ на паўночнакарэйскія выпрабаваньні.
Іншыя экспэрты мяркуюць, што Кім чакае, пакуль скончыцца крызыс, выкліканы моцнай паводкай. Падчас яе загінулі 549 чалавек і 245 зьніклі бязь вестак, былі разбураныя 4 500 дамоў і аказаліся пад вадой 20 тысяч гектараў сельскагаспадарчых земляў, што ўскладніла і без таго цяжкую эканамічную сытуацыю ў краіне.
Дарэчы, у 2003 г. Кім Чэн Ір ужо зьнікаў з публічнага жыцьця на сем тыдняў пасьля таго, як Паўночная Карэя абвясьціла пра выхад з Дамовы аб нераспаўсюджваньні ядзернай зброі, што супала з амаэрыканскім уварваньнем у Ірак.
