Артыкул «Сэксуальнае выхаванне ў Швецыі» выклікаў дыскусію на сайце nn.by. Аўтар блогу, з якога быў перадрукаваны артыкул, вырашыў адказаць усім, хто сцвярджае, быццам бы, неўзабаве шведы знікнуць як нацыя.
Узровень нараджальнасці ў Швецыі летась быў рэкордным за апошнія 15 гадоў. Індэкс нараджальнасці склаў 1,91 дзіцяці на жанчыну. (Цэнтральнае статыстычнае бюро).
 |
Лічыцца, што для паўнавартаснага дэмаграфічнага аднаўлення гэты індэкс мае складаць 2,1 дзіцяці на жанчыну. У 2008 годзе ў Швецыі нарадзіліся 109 301 дзіця, што на 1880 больш, чым у 2007 годзе. У Беларусі ў мінулым годзе нарадзілася 107 910 тыс. дзяцей. Дадам, што ў Швецыі жыве на 400 тыс. менш жыхароў, чым у Беларусі.
Дзіцячая смяротнасць у Швецыі (як і ў Нарвегіі, Фінляндыі і Ісландыі) адна з самых малых у свеце. На тысячу народжаных памірае 4. У Беларусі — 14!!!
Большасць дзяцей у сем’ях нараджаюцца ў поўных сем’ях, таму што больш 75% шведаў хочуць жыць у шлюбе, неістотна — афіцыйным ці грамадзянскім.
Шведская сям’я атрымлівае ад дзяржавы каля 1 тыс. крон у месяц (каля 395 тыс. беларускіх рублёў) на кожнае дзіця (ад моманту нараджэння да 16 гадоў альбо заканчэння школы. У Беларусі маладым бацькам пры нараджэнні дзіцяці робіццца адзіначасовая выплата ў памеры 5 бюджэтаў пражытковага мінімуму, на сёння — 1250000 руб., да трох гадоў на кожнае дзіця плацяць каля 80% ад мінімальнага пражытковага мінімуму, калі дзіця выхоўваецца ў дома — каля 200 тыс. руб., і каля 50% ад МПМ, калі дзіця выхоўваецца ў дзіцячым садку — nn.by).
Сем’і, у якіх гадуецца больш трох дзяцей, карыстаюцца дадатковымі дзяржаўнымі субсідыямі. Дэкрэтны адпачынак у Швецыі працягваецца 12 месяцаў (шэсць месяцаў для мамы і шэсць — для таты). Таму з бацькоў, хто сядзіць з дзіцём дома, выплочваецца 80% папярэдняга заробку.
Як толькі дзіцяці спаўняецца год, яшчэ цягам 90 дзён той з бацькоў, які працягвае заставацца з малым, атрымлівае дапамогу ў памеры 60-ці крон у дзень.
А ці ёсць у Швецыі праблема самотных маці? Мамы ёсць, а праблем няма. Калі мужчына адмаўляецца ад бацькоўства, то па заяве жанчыны ён павінен прымусова прайсці аналіз на бацькоўства. Калі аналіз станоўчы, то бацька абавязаны плаціць аліменты ў дзяржаўную казну, а ўжо адтуль адпаведныя службы накіроўваюць грошы маці. Калі, напрыклад, жанчына ад самага пачатку хацела сама выхоўваць дзіця, яна і так атрымае годную дапамогу ад дзяржавы.
За год у краіне адбываецца каля 33 тыс. абортаў. У Беларусь за 2008 год было зроблена амаль 39 тыс. абортаў.
